Qazaqstan EAEO elderi arasynda azyq-túlik baǵalary boıynsha tómen kórsetkishti saqtap otyr
ASTANA. KAZINFORM – 2025 jyldyń qorytyndysy boıynsha áleýmettik mańyzy bar azyq-túlik taýarlary baǵasynyń ındeksi 8,6% boldy. Qazaqstan Eýrazııalyq ekonomıkalyq odaq elderi arasynda atalǵan sanattaǵy taýarlar boıynsha eń tómen baǵalardyń birin saqtap keledi. Bul týraly QR Saýda jáne ıntegratsııa mınıstrliginiń keńeıtilgen alqa otyrysynda aıtyldy.
Bul nátıjege saýda ústemelerine baqylaýdy kúsheıtý, óńirlik komıssııalar men turaqtandyrý qorlarynyń belsendi jumysy, maýsymaralyq kezeńde naryqty tolyqtyrý sharalary, sondaı-aq saýda aktsııalary men aýyl sharýashylyǵy jármeńkelerin ótkizý sebep boldy.
Inflıatsııalyq jaǵdaıdy eskere otyryp, áleýmettik mańyzy bar azyq-túlik taýarlarynyń tizbesi ýaqytsha 19-dan 31 ataýǵa deıin keńeıtildi. Jańartylǵan tizbe boıynsha TOP-800 saýda nysany aıqyndalyp, málimetter jergilikti atqarýshy organdarǵa joldandy. Taýar naryǵyn taldaý jáne jekelegen pozıtsııalardyń ınflıatsııa qurylymyna áserin baǵalaý negizinde toǵyz basym taýar aıqyndaldy. Olardyń qataryna qyryqqabat, sábiz, kartop, pııaz, kúnbaǵys maıy, un, sıyr eti, kúrish jáne makaron ónimderi engizildi. Atalǵan taýarlar boıynsha maýsymaralyq kezeńinde basym retteý sharalary qoldanylady.
Mınıstrlik halyqty áleýmettik mańyzy bar azyq-túlik taýarlarymen maýsymdyq faktorlarǵa táýelsiz turaqty qamtamasyz etýdiń jańa modelin ázirledi. Model tirkelgen baǵalardy belgileýdi, deldaldyq qurylymdardyń negizsiz joǵary marjasyn boldyrmaýdy jáne ákimdikterdiń resýrstaryn shoǵyrlandyrý arqyly naryqqa úılestirilgen yqpal etýdi kózdeıdi.
Memleket basshysynyń tapsyrmasyna sáıkes baǵalardy tikeleı memlekettik retteýden 15% mólsherindegi shekti saýda ústemesine baqylaýdy kúsheıtýge jáne áleýmettik osal sanattaǵy azamattarǵa ataýly qoldaý kórsetýge kóshý júzege asyrylýda. Aqkól, Kókshetaý jáne Pavlodar qalalarynda azyq-túlik vaýcherlerin engizý boıynsha pılottyq jobalar tetiktiń tıimdiligin kórsetti. Jyl sońyna deıin jobany elimizdiń barlyq óńirlerinde kezeń-kezeńimen keńeıtý josparlanyp otyr.
2025 jyly shekti saýda ústemesiniń saqtalýyn memlekettik baqylaý aıasynda 2 913 ákimshilik qaýly qabyldandy. Onyń ishinde 57,1 mln teńge somasyna 1 743 aıyppul salyndy jáne 1 170 eskertý berildi.
Deldaldyq shemalardy tergep-tekserý boıynsha óńirlik komıssııalardyń 1 179 otyrysy ótti. Nátıjesinde 3 268 tıimsiz deldal jáne saýda ústemesin asyrý faktileri anyqtaldy. 2 758 jaǵdaı boıynsha ákimshilik hattamalar toltyryldy, 510 jaǵdaıda deldaldar jetkizý tizbeginen shyǵaryldy.
Qosymsha 11 236 elektrondyq shot-faktýra tizbegi taldandy. Qazaqstan Respýblıkasynyń saýda, salyq jáne monopolııaǵa qarsy zańnamasyn buzý táýekelderiniń 1 056-dan astam deregi anyqtaldy.
Buǵan deıin Úkimet azyq-túlik sektorynda ımportty almastyrýǵa bolatyn segmentterdi aıqyndaǵan edi.