Qazaqstan EAEO-dan shyǵady degen qaýeset shyndyqqa janaspaıdy – Prezıdent

NUR-SULTAN. QazAqparat – QR Prezıdenti Qasym-Jomart Toqaev Qazaqstannyń Eýrazııalyq ekonomıkalyq odaqtan shyǵýy týraly tarap júrgen qaýesetke jaýap berdi, dep habarlaıdy QazAqparat tilshisi.

«Qazaqstan osy ıntegratsııalyq birlestikterde óziniń qyzmetin ustanady. Qazaqstan Eýrazııalyq ekonomıkalyq odaqqa, Ujymdyq qaýipsizdik týraly shart uıymyna qatysty salqyndyq tanytyp otyr jáne osy uıymdardan shyǵady degen qaýesetter shyndyqqa janaspaıdy. UQShU-ǵa toqtalsaq, Máskeýdegi sózimde Qazaqstanǵa shekteýli kontıngentti jiberý arqyly UQShU 30 jyldyń ishinde alǵash ózin kórsetkenin aıtqan edim. Atap aıtqanda, bul kontıngentti Reseı emes, Ujymdyq qaýipsizdik týraly shart uıymy jiberdi», - dedi Qasym-Jomart Toqaev reseılik jýrnalıst Andreı Kondrashovqa bergen suhbatynda.

Osy oraıda Memleket basshysy Reseıde keıbir adamdar bul jaǵdaıdy burmalap júrgenin, ıaǵnı olar Reseı Qazaqstandy qutqardy, endi Qazaqstan Reseıge qaryzdar degen jańsaq pikir aıtyp júrgenin synǵa aldy. Mundaı qaýeset múldem shyndyqqa janaspaıdy.

«Dál osy UQShU-da Qazaqstan belsendi qatysýshy retinde kórinip otyr. Al buryndary bul uıym sammıterdi ótkizýmen, deklaratsııalarǵa qol qoıýmen aınalysyp júrgen edi. Endi uıym ózin aıtarlyqtaı tıimdi jaǵynan kórsete aldy. Basqa jaǵynan alyp qaraǵanda, bul jaǵdaıǵa saıası astar berýge, sondaı-aq qysyr áńgimege aınaldyrýǵa bolmaıdy», - dedi Memleket basshysy.