Qazaqstan dzıýdoshylary álem chempıonatynda 4 medal ıelendi
ASTANA. QazAqparat - Italııanyń Olbııa qalasynda ótip jatqan dzıýdodan ardagerler arasyndaǵy álem chempıonatynda Qazaqstan quramasy tórt medalǵa ıe boldy, dep habarlaıdy QazAqparat QR Dzıýdo federatsııasynyń baspasóz qyzmetine silteme jasap.
Álem chempıonatynyń alǵashqy kúninde synǵa túsken tatamı sheberleri arasynda eki qazaqstandyq dzıýdoshy jeńis tuǵyrynan kórinip, bir kúmis jáne bir qola medalǵa qol jetkizdi.
M7 kategorııasy boıynsha 100 kelige deıingi salmaq dárejesinde beldesken ardager balýanymyz Nurlan Jarashýev fınalǵa deıin qarsylas shaq keltirmedi, tek aqtyq synda kanadalyq Poland Angýstan aılasyn asyra almady.
M8 kategorııasynda 90 kelige deıingi salmaqta baǵyn synaǵan otandasymyz Anatolıı Veklıch qola medal úshin beldesken jubanysh beldesýinde ýkraınalyq Oleksandr Nosenkony ıpponmen jeńip, qola medaldi qanjyǵalady.
Álem chempıonatynyń ekinshi kúninde qazaqstandyqtar medalsiz qalǵan joq. M3 kategorııasy boıynsha 90 kelige deıingi salmaqta Denıs Korobkov pen osy salmaq dárejesinde beldesken Dáýren Muqyshev qorjynǵa qos qola medal saldy.
Esterińizge sala ketsek, Italııanyń Olbııa qalasynda ótip jatqan dzıýdodan ardagerler arasyndaǵy álem chempıonaty 3 qazanǵa deıin jalǵasady.
