Qazaqstan dzıýdodan aralas komandalyq synda álem chempıony atandy
ASTANA. KAZINFORM — Qazaqstan quramasy dzıýdodan Ekvadorda ótken jasóspirimder arasyndaǵy álem chempıonatynyń aralas-komandalyq jarysynda jeńimpaz atanyp, tarıhı nátıjege qol jetkizdi. Bul týraly Qazaqstan dzıýdo federatsııasynyń baspasóz qyzmeti habarlady.
Fınalda Qazaqstan quramasy Brazılııanyń sportshylarmen kezdesti. Negizgi beldesýler 3:3 esebimen teń aıaqtalǵan soń, jeńimpazdy anyqtaý úshin qosymsha beldesýdiń jerebesi tartyldy. Jerebe boıynsha -48 kg salmaq dárejesi túsip, sheshýshi kezdesýde Iıanat Jubatqan Qazaqstanǵa chempıondyq ataqty syılady.
Fınalda Qazaqstan sapynda Rasýlhan Ǵabıt (-60 kg), Іnjý Jumajan (-63 kg), Bekalı Erken (-81 kg), Toǵjan Tólebaı (+63 kg), Ádiljan Jaýdınov (+81 kg) jáne Iıanat Jubatqan (-48 kg) kúresti.
Qazaqstan quramasy jarys jolyn Bolgarııany 4:1 esebimen jeńýden bastady. Shırek fınalda Japonııa quramasyn 4:2 esebimen, al jartylaı fınalda Ózbekstan sportshylaryn 4:2 esebimen jeńdi.
Bul — Qazaqstan dzıýdosy tarıhyndaǵy jasóspirimder arasyndaǵy álem chempıonatynyń aralas komandalyq synynda qol jetkizilgen alǵashqy chempıondyq ataq.
Aıta keteıik, Fatıma Supyǵalıeva Qazaqstan tarıhynda dzıýdodan qyzdar arasynda tuńǵysh álem chempıony atandy.
