Qazaqstan dzıýdo quramasynyń jattyqtyrýshysy halyqaralyq týrnırlerge daıyndyq týraly aıtty
ASTANA. KAZINFORM – Qazaqstannyń dzıýdo boıynsha ulttyq quramasy Parıjdegi Grand Slam týrnırinen keıin jańa maýsymǵa daıyndyqty jalǵastyryp jatyr. Komandanyń jattyqtyrýshy-keńesshisi Robert Mshvıdobadze sportshylardyń qazirgi daıyndyǵyn baǵalap, aldaǵy basym jarystar týraly aıtty.
Ulttyq olımpıada komıtetiniń málimetinshe, 6-8 naýryz aralyǵynda qazaqstandyq dzıýdoshylardy eki halyqaralyq jarys kútip tur – Ózbekstandaǵy «Úlken dýlyǵa» jáne Aýstrııadaǵy Gran-prı týrnıri.
«Barlyq balýandar jaqsy sporttyq formada. Jattyǵý protsesine aıtarlyqtaı ózgeris engizilgen joq. Tek Ábıba Ábýjaqynovany sýyq tııýine baılanysty belgili bir kezeńde jattyǵýdan bosattyq. Qalǵany jospar boıynsha ótti. Endi dzıýdoshylarymyzdyń nátıjeli óner kórsetýin kútemiz», – dedi Robert Mshvıdobadze.
Onyń aıtýynsha, ulttyq quramada túbegeıli ózgerister joq. Degenmen birqatar jas sportshylar negizgi quramǵa qosylǵan.
«Bul – qýanyshty jaǵdaı. Bolashaǵynan úmit kúttiretin, eńbekqor jastar. Júıeli jumysty jalǵastyryp kelemiz. Jaqyn arada olar da nátıjesin kórsete bastaıdy dep oılaımyn», – dedi jattyqtyrýshy.
Ol Grand Slam men Gran-prı týrnırlerine tolyq daıyn sportshylar ǵana iriktelgenin atap ótti. Jattyqtyrýshylar shtaby ár balýannyń jaǵdaıyn jiti baqylap, sporttyq babyna qaraı jarysqa qatysý týraly sheshim qabyldaıdy.
«Qazir kóptegen balýan babyna enip keledi. Muny Parıjdegi týrnır nátıjeleri de kórsetti. Ótken jyly basty nazar fızıkalyq daıyndyqqa aýdarylyp, sportshylar negizinen álem jáne Azııa chempıonattaryna, sondaı-aq tórt halyqaralyq týrnırge qatysty. Qazir bári qalypty. Bıyl birneshe jarysta medal jeńip alamyz dep senemin», – dedi ol.
Maýsymdaǵy basym baǵyttarǵa toqtalǵan Robert Mshvıdobadze negizgi nazar álem chempıonaty men Azııa oıyndaryna aýdarylatynyn aıtty.
«Oǵan deıin Azııa chempıonaty bar. Maýsym barysynda josparǵa túzetýler engizilýi múmkin. Degenmen basty maqsat – Azııa oıyndarynda sátti óner kórsetý», – dep túıindedi jattyqtyrýshy.
Eske salsaq, Qazaqstan quramasy Parıjdegi Grand Slam týrnırin úsh qola medalmen aıaqtady. Jýyrda Tashkenttegi «Úlken dýlyǵaǵa» qatysatyn ulttyq quramanyń tizimi jarııalanǵan bolatyn.