Qazaqstan dzıýdo quramasy Qazaqstan Barysy Grand Slam jarysyn tarıhı nátıjemen aıaqtady
ASTANA. KAZINFORM — Dzıýdodan Qazaqstan quramasy Qazaqstan Barysy Grand Slam álemdik básekesin tarıhı jetistikpen aıaqtady. Astana qalasynda ótken básekede dzıýdoshylar eki altyn, eki kúmis jáne tórt qola júldege qol jetkizdi.
Qazaqstan dzıýdo federatsııasynyń baspasóz qyzmetinen málim etkenindeı, álemniń 36 elinen 295 tatamı sheberi qatysqan jahandyq dodany Qazaqstan quramasy jalpy medal kestesinde 3-shi orynǵa turaqtady.
Atap aıtqanda, 81 kelige deıingi salmaqta Jalǵas Qaırolla men Marat Baıqamýrov (- 100 kg) týrnır chempıony atanyp, Qazaqstan qorjynyna qos altyn júlde saldy.
Kúmis júldeni 60 kelige deıingi salmaqta Talǵat Orynbasar jáne Kámıla Berliqash (+78 kg) jeńip aldy.
Al qola medaldardy 60 kelige deıingi salmaqta Sherzod Davlatov, 73 kelige deıingi salmaqta Ansarbek Ǵaınýllın, 90 kelige deıingi salmaqta Aıdar Arapov jáne +78 keli salmaq dárejesinde Aıda Toıshybekova ıelendi.
Bul elimizdiń tarıhyndaǵy eleýli jetistik, buryn-sońdy Qazaqstan atynan Grand Slam jarystarynda eki birdeı chempıon shyqpaǵan.
Qazaqstan bul bedeldi jarysty tórtinshi jyl qatarynan qabyldap, álemdik dzıýdo qaýymdastyǵy aldyndaǵy joǵary uıymdastyrýshylyq deńgeıin taǵy bir márte dáleldedi. Aıtýly dodaǵa Olımpıada jáne álem chempıondary, Grand Slam jáne Masters týrnırleriniń júldegerleri qatysty.
Týrnırdiń alǵashqy kúnindegi fınaldyq beldesýlerdi Qazaqstan Respýblıkasynyń Prezıdenti Qasym-Jomart Toqaev arnaıy kelip tamashalady. Al Olımpıada chempıony Eldos Smetov qatysqan «Golden Fight» kezdesýi týrnırdiń erekshe sátteriniń birine aınaldy.
2023-2026 jyldary Halyqaralyq dzıýdo federatsııasynyń kúntizbesine sáıkes reıtıngtik Grand Slam kezeńin sátti ótkizgen Qazaqstan 2027 jyly Astanada dzıýdodan eresekter arasyndaǵy Álem chempıonatyn qabyldaıdy.
Eske sala keteıik, budan buryn dzıýdoshy Marat Baıqamýrovtyń Grand Slam týrnırinde top jarǵanyn jazǵan edik.
