Qazaqstan DZMU-ǵa Ónerkásiptik úlgilerdi qorǵaýǵa qatysty qujatty tapsyrdy

JENEVA. QazAqparat – Dúnıejúzilik zııatkerlik menshik uıymynyń (DZMU) Bas dırektory Daren Tangqa 1994 jylǵy 9 qyrkúıektegi Eýrazııalyq patent konventsııasyna Ónerkásiptik úlgilerdi qorǵaý týraly hattamany Qazaqstan Respýblıkasynyń ratıfıkatsııalaýy týraly Qural saqtaýǵa berildi, dep habarlaıdy QR SІM baspasóz qyzmeti.

Ratıfıkatsııalyq qujatty Jenevadaǵy BUU jáne basqa da halyqaralyq uıymdar janyndaǵy Qazaqstan Respýblıkasynyń Turaqty ókili Janar Aıtjanova tabys etti. Ratıfıkatsııalaý týraly Quraldy tabystaý rásimi Eýrazııalyq patenttik uıymy Eýrazııalyq patenttik vedomstvosynyń Prezıdenti Sáýle Tleýlesovanyń qatysýymen ótti.

Hattamanyń kúshine enýi Eýrazııa óńiri elderiniń ónerkásiptik úlgilerin quqyqtyq qorǵaýdyń jańa memleketaralyq júıesin qurýda mańyzdy oqıǵa bolmaq.

Ónerkásiptik úlgige patenttiń aýqymdy qoldanylý aımaǵy – Eýrazııalyq patentteý júıesine qatysýshy 8 memleket jáne barlyq 8 elde (Armenııa, Ázirbaıjan, Belarýs, Qyrǵyzstan, Qazaqstan, Reseı, Tájikstan jáne Túrikmenstan) bir basymdyq kúnin belgileý múmkindigi osy júıeniń artyqshylyqtary bolyp tabylady.

Ónerkásiptik menshik obektilerin tirkeýdiń memleketaralyq júıesine qatysý otandyq taýar óndirýshiler úshin jańa ıdeıalar men biregeı buıymdarǵa óz quqyqtaryn qorǵaý aýmaǵyn keńeıtýde jańa múmkindikter ashady, sondaı-aq sheteldik patent ıelenýshiler úshin Qazaqstannyń tartymdylyǵyn arttyrady.