Qazaqstan djıý-djıtsýdy damytýdyń álemdik reıtınginde 2-orynǵa turaqtady
NUR-SULTAN. QazAqparat - Qazaqstan djıý-djıtsýdy damytý boıynsha álemdegi úzdik elder qatarynan kórindi, dep habarlaıdy QazAqparat Qazaqstannyń djıý-djıtsý qaýymdastyǵyna silteme jasap.
Halyqaralyq djıý-djıtsý federatsııasy Qazaqstandy djıý-djıtsý damytyp otyrǵan úzdik elderdiń biri dep tanydy. Ábý-Dabıde atalmysh sport túrin keńinen nasıhattap júrgen 36 memleket ókilderiniń qatysýymen djıý-djıtsýden ótken Álem chempıonaty aıasynda JJAU Azııa Odaǵynyń Bas Assambleıasynda elimizge kúmis medaldi tabystaý týraly sheshim jarııa etildi. Qazaqstandyq sportshylardy JJIF federatsııasynyń Prezıdenti Panaıotıs Teodoropýlos marapattady.
«Djıý-djıtsý Qazaqstanda endi ǵana damyp kele jatqan jańa sport túri. Sońǵy eki jylda aıtarlyqtaı jetistikterge qol jetkizildi. Bizdi álemdik deńgeıde moıyndaǵany - sonyń dáleli. JJIF djıý-djıtsýdi damytqany úshin álem boıynsha ekinshi oryndy Qazaqstanǵa berýi bizdiń sportshylarymyzdyń halyqaralyq dodalardaǵy jeńisteriniń nátıjesi, sondaı-aq elimizde iri jarystardy ótkizgenimiz úshin berildi», - dedi Qazaqstannyń djıý-djıtsý Qaýymdastyǵynyń Prezıdenti Bolat Majaǵulov.
Al keler jyldyń aqpan aıynda Qazaqstanda biregeı shara ótedi. Sheteldik ulttyq quramalardyń músheleri Almaty oblysyndaǵy oqý-jattyǵý bazasynda birlesken jıyn ótkizedi. Jergilikti mekenniń tumsa tabıǵaty men taza aýasy sportshylarǵa oń áserin tıgizbek. Oqý-jattyǵý sharasyna 200-den astam adam keledi dep kútilýde.
Aıta keteıik, Ábý-Dabıde ótken Álem chempıonatynda qazaqstandyq sportshylar 3 altyn, 9 kúmis jáne 12 qola júldeni qanjyǵasyna baılady. Dúbirli dodada jas sportshylar da, Qazaqstannyń ulttyq quramasynyń músheleri de kúsh synasty. Para-sportshy Ildar Zaınalov ta el qorjynyna kúmis medal saldy. Jarys qorytyndysy boıynsha Qazaqstan komandalyq esepte Ne-Waza bóliminde úshinshi oryn aldy.
