Qazaqstan Dúnıejúzilik keden uıymy Qarjy komıtetiniń quramyna saılandy
ASTANA. KAZINFORM — Bul sheshim Eýropa óńiriniń «Shyǵys» kishi tobyna múshe memleketterdiń Qazaqstanǵa degen joǵary senimin bildiredi , dep habarlaıdy QR QM Memlekettik kirister komıteti baspasóz qyzmeti.
2026 jylǵy 25-27 maýsym aralyǵynda QR Qarjy mınıstrligi Memlekettik kirister komıtetiniń delegatsııasy Belgııa Koroldiginiń Brıýssel qalasyndaǵy Dúnıejúzilik keden uıymynyń (DKU) shtab-páterinde ótken Uıym Keńesiniń 147-shi jáne 148-shi sessııalaryna qatysty.
Qazaqstandyq delegatsııany QR Qarjy mınıstrligi Memlekettik kirister komıtetiniń Tóraǵasy Jandos Dúısembıev basqardy.
Sessııalar barysynda DKU-ǵa múshe memleketter halyqaralyq kedendik yntymaqtastyqty damytý, kedendik ákimshilendirýdi jetildirý, keden qyzmetterin tsıfrlyq transformatsııalaý, zańdy halyqaralyq saýdaǵa járdemdesý, jahandyq jetkizý tizbekteriniń qaýipsizdigin nyǵaıtý, sondaı-aq kedendik quqyq buzýshylyqtarǵa qarsy is-qımyldyń tıimdiligin arttyrý máselelerin qarastyrdy.
Sessııalar aıasynda Memlekettik kirister komıtetiniń tóraǵasy Dúnıejúzilik keden uıymynyń bas hatshysy Ien Sonderspen, Uıym Hatshylyǵynyń basshylyǵymen, sondaı-aq Bolgarııa, Majarstan, Polsha, Túrkııa, Koreıa Respýblıkasy, Estonııa jáne Japonııa keden ákimshilikteriniń basshylary men ókilderimen birqatar ekijaqty kezdesý ótkizdi.
Taraptar ekijaqty jáne kópjaqty yntymaqtastyqty damytý perspektıvalaryn, kedendik ákimshilendirý, táýekelderdi basqarý, kadrlar daıarlaý salalaryndaǵy tájirıbe almasý máselelerin, sondaı-aq Dúnıejúzilik keden uıymy aıasyndaǵy birlesken jobalar men bastamalardy iske asyrýdy talqylady.
Qazaqstannyń DKU Keńesiniń jumysyna qatysýy elimizdiń halyqaralyq kedendik yntymaqtastyqty nyǵaıtýǵa jáne sheteldik keden ákimshilikterimen praktıkalyq ózara is-qımyldy damytýǵa degen berik ustanymynyń kezekti dáleli boldy.
— Sessııanyń mańyzdy qorytyndylarynyń biri — Qazaqstan Respýblıkasynyń 2026-2027 qarjy jylyna arnalǵan Dúnıejúzilik keden uıymynyń Kirister komıtetiniń quramyna saılanýy boldy. Bul sheshim Eýropa óńiriniń «Shyǵys» kishi tobyna múshe memleketterdiń Qazaqstanǵa degen joǵary senimin bildiredi jáne elimizdiń Dúnıejúzilik keden uıymy qyzmetine belsendi qatysýynyń moıyndalǵanyn kórsetedi. Qazaqstannyń Kirister komıtetiniń quramyna enýi elimizge Uıymnyń bıýdjettik saıasaty, qarjy resýrstaryn bólý jáne onyń qyzmet tetikterin jetildirý máselelerin qaraýǵa tikeleı qatysýǵa múmkindik beredi. Sonymen qatar, bul Qazaqstannyń halyqaralyq kedendik yntymaqtastyqty damytýdaǵy rólin odan ári kúsheıtedi, — delingen habarlamada.
Buǵan deıin memlekettik kirister komıteti qazaqstandyqtardy alaıaqtardan saq bolýǵa shaqyrdy.
