Qazaqstan dúnıejúzilik EXPO 2025 Osaka kórmesinde birinshi oryndy ıelendi
ASTANA. KAZINFORM – Dúnıejúzilik EXPO 2025 Osaka kórmesi óz jumysyn aıaqtady. Kórmege qatysýshy memleketter úshin basty oqıǵa bolyp sanalatyn EXPO Awards marapattaý rásimi keshe, 12 qazanda ótti.
Atalǵan rásim barysynda Qazaqstan pavılony Theme Development («Kórme taqyrybyn ashý») negizgi nomınatsııasy boıynsha «S» sanatyndaǵy shaǵyn pavılondar arasynda birinshi oryndy ıelendi. Bul sanatqa 90-nan astam el kirdi. Qazaqstan ekspozıtsııasy kórmeniń basty taqyrybyn mazmundy jáne erekshe túrde ashqany úshin joǵary baǵaǵa ıe boldy.
- Kórme bastalǵan kúnnen bastap Qazaqstan pavılony japondyqtar men sheteldik týrıster arasynda úlken qyzyǵýshylyq týdyrdy. Pavılon elimizdiń mádenıeti, dástúri men tarıhy, ınvestıtsııalyq, ekonomıkalyq jáne ınnovatsııalyq damýy, sondaı-aq tsıfrlandyrý, tehnologııa jáne turaqty damý salalaryndaǵy mazmundy ári tartymdy ekspozıtsııasymen erekshelendi. Osy oraıda halyqaralyq jáne japon buqaralyq aqparat quraldary pavılon týraly birqatar maqalalar jarııalady, - delingen Saýda jáne ıntegratsııa mınıstrliginiń aqparatynda.
Kórme barysynda Qazaqstan pavılony yntymaqtastyq pen ózara tájirıbe almasýdyń mańyzdy alańyna aınalyp, elimizdiń jahandyq qoǵamdastyqtaǵy ashyq ári senimdi seriktes retindegi mártebesin nyǵaıtty. Pavılon aıasynda toǵyz iskerlik jáne mádenı is-shara uıymdastyryldy. Eń iri oqıǵalardyń biri – Qazaqstannyń Ulttyq kúni, ol 2025 jylǵy 10 tamyzda uly oıshyl Abaı Qunanbaıulynyń 180 jyldyǵyna oraı ótti. Sol kúni EXPO National Day Hall alańynda Qazaqstan Respýblıkasynyń týy kóterilip, aýqymdy merekelik kontserttik baǵdarlama uıymdastyryldy. Sharaǵa shamamen 3 000 kórermen qatysty.
Qazaqstan pavılony «Ómirdi biriktirý» klasterinde ornalasyp, shamamen 1,5 mıllıon adamdy qabyldady. Olardyń qatarynda resmı delegatsııalar, halyqaralyq uıymdar, dıplomatııalyq mıssııalar, bıznes, medıa jáne shyǵarmashylyq qaýym ókilderi boldy. Pavılonǵa Halyqaralyq kórmeler bıýrosynyń (BIE) Bas hatshysy Dımıtrı Kerkentzes resmı saparmen kelip, onyń uıymdastyrylý deńgeıin, mazmunyn jáne ekspozıtsııalyq sheshimin joǵary baǵalady.
Dúnıejúzilik EXPO 2025 Osaka kórmesi 2025 jylǵy 13 sáýir men 13 qazan aralyǵynda ótti. Іs-sharaǵa 160 memleket pen 9 halyqaralyq uıym qatysty, al jalpy kelýshiler sany 28 mıllıon adamnan asty. Alty aı boıy ıÝmeshıma araly «Bizdiń ómirimiz úshin bolashaq qoǵamyn qurý» taqyrybyndaǵy jahandyq dıalogtyń basty alańyna aınaldy.
Aıta keteıik, buǵan deıin EXPO 2025 Osaka kórmesindegi Qazaqstan pavılony mıllıonynshy meımanyn qarsy aldy.