Qazaqstan Dúnıejúzilik banktiń tsıfrlandyrý jónindegi jahandyq strategııasyna qosylýy múmkin
ASTANA. KAZINFORM — Oljas Bektenov Dúnıejúzilik banktiń vıtse-prezıdenti Sangbý Kımmen tsıfrlandyrý jáne JI salasyndaǵy yntymaqtastyq máselesin talqylady, dep habarlaıdy Úkimettiń baspasóz qyzmeti.
Qazaqstan Premer-mınıstri Oljas Bektenov Dúnıejúzilik banktiń tsıfrlyq tehnologııalar jáne jasandy ıntellekt jónindegi vıtse-prezıdenti Sangbý Kımmen kezdesti.
Kezdesý barysynda Qazaqstan men Dúnıejúzilik bank toby arasyndaǵy tsıfrlandyrý, jasandy ıntellekt, GovTech jáne telekommýnıkatsııalyq ınfraqurylymdy damytý salalaryndaǵy áriptestikti odan ári nyǵaıtý máseleleri qaraldy. Jıynda Qazaqstandaǵy «Derekterdi óńdeý ortalyqtary alqaby» jobasyn júzege asyrý máselesine nazar aýdaryldy. Talqylaýǵa Qazaqstan Prezıdentiniń keńesshisi — Strategııalyq josparlaý jáne reformalar agenttiginiń tóraǵasy Áset Erǵalıev, jasandy ıntellekt jáne tsıfrlyq damý, ulttyq ekonomıka, qarjy vıtse-mınıstrleri qatysty.
— Jalpyulttyq referendýmda qabyldanǵan QR jańa Konstıtýtsııasy tehnologııalyq ınnovatsııalar men jedeldetilgen tsıfrlyq transformatsııa arqyly ekonomıkany nyǵaıtýǵa múmkindik ashty. Prezıdent Qasym-Jomart Toqaev Qazaqstandy tolyqqandy tsıfrlyq elge aınaldyrý jónindegi strategııalyq maqsatty aıqyndady. Bul jyl Tsıfrlandyrý jyly dep jarııalanyp, ekonomıkanyń barlyq salasyna JI sheshimderin aýqymdy engizýge basymdyq berilip otyr. 2029 jylǵa deıingi Digital Qazaqstan jalpyulttyq strategııasy qabyldandy. Qazaqstannyń tsıfrlyq transformatsııa baǵdarlamasyn ilgeriletýge Dúnıejúzilik banktiń qosqan eleýli úlesin erekshe atap ótkim keledi. Biz josparlaǵan barlyq bastamanyń ýaqtyly júzege asyrylýyna úlken mán beremiz, — dedi Oljas Bektenov.
Qazaqstan Dúnıejúzilik banktiń GovTech jetilý ındeksiniń (GTMI) «A» tobyna kiredi jáne álemde 6-shy orynda tur. Búgingi tańda Qazaqstan men Dúnıejúzilik bank ınklıýzıvti ekonomıka úshin jedeldetilgen tsıfrlandyrý, JI salasynda adamı kapıtaldy damytý boıynsha birqatar birlesken jobalardy júzege asyryp jatyr.
Dúnıejúzilik banktiń tsıfrlyq tehnologııalar jáne jasandy ıntellekt jónindegi vıtse-prezıdenti Sangbý Kım Qazaqstanda tsıfrlandyrý deńgeıi joǵary ekenin atap ótti. Mańyzdy jobalardyń qatarynda Derekterdi óńdeý ortalyqtaryn damytý, Kaspıı arqyly sýasty talshyqty-optıkalyq kabelin salý, aýyldyq jerlerde baılanysty qamtamasyz etý jáne tsıfrlyq memlekettik servıster, jasandy ıntellekt jáne tehnoparkter salasyndaǵy bastamalar bar. Dúnıejúzilik bank osy bastamalarǵa qoldaý kórsetýge daıyn.
— Qazaqstandaǵy tsıfrlandyrýdyń qazirgi mártebesi — kóptegen basqa damýshy eldermen salystyrǵanda óte ozyq. Sizderde jaqsy damyǵan mobıldi baılanys, sapaly qyzmet kórsetetin elektrondyq úkimet platformasy, jeke sektorǵa arnalǵan damyǵan ekojúıe, tıimdi ulttyq strategııa jáne saıasat bar. Jaqynda JI salasynda jańa zań qabyldadyńyzdar. Osynyń bári óte keremet uıymdastyrylǵan. Men sizdermen jumys isteı bastaǵanyma óte qýanyshtymyn. Jasandy ıntellekt salasynda jańa syn-qaterler bar, sondyqtan da bul mindetti júzege asyrý bárimiz úshin ońaı soqpasy anyq, — dep atap ótti Sangbý Kım
Kezdesý qorytyndysy boıynsha Dúnıejúzilik banktiń tsıfrlyq tehnologııalar jáne jasandy ıntellekt jónindegi vıtse-prezıdenti Sangbý Kım Qazaqstandy Dúnıejúzilik banktiń tsıfrlandyrý jáne jasandy ıntellekt jónindegi jahandyq strategııasynyń negizgi seriktes ári qatysýshy el bolýǵa shaqyrdy. Baǵdarlama tsıfrlyq ekonomıkaǵa ınvestıtsııa tartýǵa baǵyttalǵan. Tıptik kelisim baǵyttary tsıfrlyq baılanys pen ınfraqurylymdy damytý, tsıfrlyq memlekettik platformalar men sáıkestendirý júıelerin jetildirý, derekterdi retteý jáne kıberqaýipsizdikti qamtamasyz etý, sondaı-aq tsıfrlyq daǵdylardy damytý jáne jasandy ıntellekt ekojúıesin ilgeriletýdi qamtıdy. Elderge arnalǵan tsıfrlyq kelisimder ár memlekettiń ulttyq basymdyqtaryna sáıkes beıimdeledi. Osylaısha, Qazaqstan Respýblıkasynyń ulttyq kún tártibi Dúnıejúzilik banktiń qoldaýymen naqty ınvestıtsııalyq jobalarmen jáne reformalarmen úılestiriletin bolady.
Premer-mınıstr Oljas Bektenov vıtse-prezıdent Sangbý Kımge jáne Dúnıejúzilik bank komandasyna Qazaqstannyń tsıfrlyq transformatsııa salasyndaǵy bastamalaryn qoldaǵany úshin alǵys aıtyp, Úkimettiń World Bank Digital Compact-ke qatysýǵa daıyndyǵyn atap ótti.
Budan buryn Prezıdent 2029 jylǵa deıingi «Digital Qazaqstan» strategııasyn bekitkenin jazǵanbyz.
