Qazaqstan Dúnıejúzilik banktiń reıtınginde 21 pozıtsııaǵa kóterildi

ASTANA. KAZINFORM — Qazaqstan Dúnıejúzilik banktiń statıstıkalyq tıimdilik kórsetkishteri reıtınginde 217 eldiń ishinde 44-orynǵa ıe boldy. Aldyńǵy jylmen salystyrǵanda (2023 jyly – 65-oryn) kórsetkish birden 21 pozıtsııaǵa joǵarylaǵan. Bul týraly Ulttyq statıstıka bıýrosy habarlady. 

Dúnıejúzilik bank jyl saıyn resmı túrde tanylǵan halyqaralyq derekkózder negizinde qalyptastyrylatyn statıstıkalyq tıimdilik kórsetkishteri (Statistical Performance Indicators – SPI) reıtıngin jarııalaıdy. Bul reıtıngte álemdik damý týraly ózekti ári naqty málimetter qamtylady, sonyń ishinde ulttyq, óńirlik jáne jahandyq baǵalaýlar bar.

Statıstıkalyq tıimdilik kórsetkishteri eldiń ulttyq statıstıkalyq júıesiniń derekterdi paıdalaný, kórsetiletin qyzmetter, statıstıkalyq ónimder, derekkózder jáne derekter ınfraqurylymy sııaqty krıterıler boıynsha múmkindikterin sıpattaıdy. Kórsetkishter 0-den 100-ge deıingi shkala boıynsha baǵalanady, mundaǵy 100 – eń joǵary deńgeı.

Sońǵy derekterge sáıkes, Qazaqstannyń ulttyq statıstıkalyq júıesi 100 múmkin baldan 84,9 ball jınady. Jalpy kórsetkishtiń ósýine kelesi quramdas bólikterdiń jaqsarýy áser etken: «Derekterdi paıdalaný» – +10, «Derekkózder» – +10,2, «Derekter ınfraqurylymy» – +10 jáne «Derekterdi usyný qyzmetteri» – +1,1 ball.

SPI-2024 reıtıngi boıynsha alǵashqy úshtikke Norvegııa, Shvetsııa jáne Kanada kiredi. 

Aıta ketelik Qazaqstan jahandyq zeınetaqy ındeksinde «ornyqtylyq» reıtıngin saqtap qaldy.