Qazaqstan Dúnıejúzilik banktiń mıneraldar bastamasyna qosyldy

Qazaqstan Dúnıejúzilik bank tobynyń Metals and Minerals Compact jahandyq bastamasyna qosylǵan Ortalyq Azııa boıynsha alǵashqy el atandy.

Qazaqstannyń atalǵan jahandyq bastamaǵa resmı túrde qosylý rásimi bıylǵy 16 qazanda Taılandta ótken Dúnıejúzilik bank toby men Halyqaralyq valıýta qorynyń jyl saıynǵy kezdesýleri aıasynda ótti. Qazaqstan tarapynan rásimge QR Ónerkásip jáne qurylys mınıstrligine qarasty «Ulttyq geologııalyq qyzmet» AQ basqarma tóraǵasy Erlan Ǵalıev qatysty.

Memleket basshysynyń Qazaqstan halqyna Joldaýyndaǵy taý-ken metallýrgııa keshenin damytý jáne ekonomıka salalaryna ınvestıtsııa tartý jónindegi tapsyrmalaryn júzege asyrý aıasynda QR Ónerkásip jáne qurylys mınıstrligi men QR Strategııalyq josparlaý jáne reformalar agenttigi Dúnıejúzilik bankpen birlesip, Metaldar men mıneraldar jónindegi eldik strategııany (Compact) ázirledi. Qujat 2026-2030 jyldarǵa arnalǵan áriptestiktiń negizgi baǵyttaryn aıqyndaıdy jáne Dúnıejúzilik bank tobynyń qarjylyq, taldamalyq jáne tehnıkalyq qoldaý quraldaryn biriktiredi.

Compact Qazaqstannyń strategııalyq qujattaryna, onyń ishinde 2029 jylǵa deıingi Ulttyq damý josparyna, 2023-2027 jyldarǵa arnalǵan geologııa salasyn damytý tujyrymdamasyna jáne 2024-2028 jyldarǵa arnalǵan sırek jáne jerde sırek kezdesetin metaldar salasyn damytý jónindegi keshendi josparǵa negizdeldi. Negizgi baǵdarlardyń biri – 2031 jylǵa deıin shamamen $20 mlrd kóleminde ınvestıtsııa tartýǵa járdemdesý. Qarajatty mıneraldyq-shıkizat bazasyn keńeıtýge, óndirý jáne óńdeý kásiporyndaryn damytýǵa, zamanaýı tehnologııalardy engizýge jáne qajetti ınfraqurylym qurýǵa baǵyttaý kózdelip otyr.

Compact yntymaqtastyqtyń úsh negizgi baǵytyn qamtıdy:

Birinshi – taý-ken metallýrgııa keshenindegi memlekettik saıasat pen retteý tetikterin jetildirý. Bul ashyq ári boljamdy orta qalyptastyrýǵa, ınvestıtsııalyq ahýaldy jaqsartýǵa, sondaı-aq halyqaralyq ekologııalyq jáne áleýmettik standarttardy engizýge qajetti jaǵdaı jasaıdy.

Ekinshi – geologııalyq barlaý jumystaryn, ınfraqurylymdy jáne kadrlyq áleýetti damytý. Basym baǵyttar qatarynda geologııalyq derekterdi tsıfrlandyrý, energetıkalyq jáne kólik ınfraqurylymyn damytý, metaldardy óńdeýdiń zamanaýı tehnologııalaryn engizý jáne bilikti mamandar daıarlaý bar.

Úshinshi – mıneraldyq-shıkizat óndirýge jáne tereń óńdeýge jeke ınvestıtsııalar tartý. Bul boıynsha Dúnıejúzilik bank tobynyń qarjylyq jáne kepildik quraldaryn paıdalana otyryp, ınvestıtsııalyq jobalardy qoldaý, qosylǵan quny joǵary ónim óndiretin kásiporyndardy damytý jáne halyqaralyq ınvestorlardy tartý kózdeledi.

- Qazaqstan mıneraldyq-shıkizat sektoryn jaýapkershilikpen turaqty damytý qaǵıdattaryn ustanady. Dúnıejúzilik bank tobymen yntymaqtastyq shıkizat óńdeýdi damytý jáne qosylǵan quny joǵary ónim óndirisin keńeıtý jónindegi ulttyq basymdyqtardy júzege asyrýǵa yqpal etedi. Biz salanyń básekege qabilettiligi men turaqtylyǵyn arttyrýǵa, ekonomıkany ártaraptandyrýǵa jáne elimizdiń tabıǵı resýrstyq áleýetin tıimdirek paıdalanýǵa múmkindik beretin áriptestikti odan ári nyǵaıtýǵa nıettimiz, – dep atap ótti QR Ónerkásip jáne qurylys mınıstri Ersaıyn Naǵaspaev.

Kelisimdi júzege asyrý shıkizatty tereń óńdeýdi damytýǵa, jańa jumys oryndaryn ashýǵa jáne Qazaqstannyń jahandyq óndiristik tizbekterdegi pozıtsııasyn odan ári nyǵaıtýǵa yqpal etedi.