Qazaqstan Dúnıejúzilik banktiń qoldaýymen $8 mlrd-tan astam somaǵa qansha jobany júzege asyrdy
ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Dúnıejúzilik banktiń Eýropa jáne Ortalyq Azııa óńirindegi ál-aýqat máseleleri jónindegi óńirlik dırektory Abebe Adýgnamen kezdesti. Bul týraly Úkimettiń baspasóz qyzmeti habarlady.
Taraptar aǵymdaǵy ekonomıkalyq jaǵdaıdy, reformalardyń odan arǵy baǵyttaryn, ınfraqurylymdy damytýdy jáne yntymaqtastyq perspektıvasyn talqylady.
Kezdesýdi ashqan Serik Jumanǵarın Qazaqstannyń Dúnıejúzilik bank tobymen áriptestiginiń strategııalyq sıpatyn atap ótti. Yntymaqtastyqtyń 33 jyly ishinde banktiń qoldaýymen kólik, bilim berý, qorshaǵan ortany qorǵaý, jasyl tehnologııa jáne tsıfrlandyrý salasynda jalpy somasy $8 mlrd-tan asatyn qarjyǵa 50-den astam joba júzege asyryldy.
Abebe Adýgna Qazaqstan ekonomıkasynyń ósý men ınvestıtsııalyq belsendiliktegi oń dınamıkasyn atap ótti.
Kezdesýdiń edáýir bóligi ınfraqurylymdy damytýǵa jáne ony qarjylandyrý tetikterine arnaldy. Dúnıejúzilik bank ókilderi ınfraqurylymdyq ınvestıtsııalardy olardyń tıimdiligin arttyratyn jáne ónimdilik pen ınnovatsııanyń ósýine jaǵdaı jasaıtyn ınstıtýtsıonaldyq jáne retteýshi reformalarmen súıemeldeý mańyzdy ekenin atap ótti.
Serik Jumanǵarın Qazaqstan ınfraqurylymdy damytýdy tek ishki qajettilik turǵysynan ǵana emes, aımaqtyq kontekste de qarastyryp otyrǵanyn aıtty. Sóz Ortalyq Azııany basqa aımaqtarmen baılanystyratyn kólik baǵyttaryn odan ári damytý týraly.
– Qazaqstannyń ınfraqurylymy – Ortalyq Azııanyń iri biryńǵaı ınfraqurylymdyq tizbegin qurýdaǵy alǵashqy qadam ǵana. Sóz tek bizdiń ishki joldarymyz ben temirjoldardy jaqsartý týraly ǵana bolyp otyrǵan joq. Bul joldardyń barlyǵy biz úshin jáne kórshi elder úshin tıimdi bolýyn qamtamasyz etýimiz kerek, - dep atap ótti Serik Jumanǵarın.
Dúnıejúzilik bank halyqaralyq tájirıbeni eskere otyryp, ınfraqurylymdy qarjylandyrý tetikteri boıynsha qazaqstandyq tarappen jumysty jalǵastyrýǵa daıyn ekenin rastady.
Aıta keteıik, qazirgi qarjy júıesine geosaıası ahýal men tehnologııanyń qarqyndy damýy kóp yqpal etip otyr. Bul týraly Ulttyq bank tóraǵasy Tımýr Súleımenov Astana Finance Days 2026 aıasynda aıtty.
