Qazaqstan Dúnıejúzilik atom aptalyǵynda AES qurylysyna qatysty málimdeme jasady

ASTANA. KAZINFORM — Qazaqstandyq delegatsııa Atom energııasy agenttiginiń tóraǵasy A. Satqalıevtiń basshylyǵymen Máskeýde ótip jatqan Dúnıejúzilik atom aptalyǵyna qatysty.

Sapardyń negizgi baǵyty – Qazaqstanda alǵashqy atom elektr stantsııasyn salý. Qazaqstan tarapynan atom salasynyń halyqaralyq kompanııalary men ǵylymı uıymdarynyń basshylarymen birqatar ekijaqty kezdesýler ótkizildi. «Rosatom» memlekettik korporatsııasynyń basshylyǵymen ótken kelissózderge erekshe nazar aýdaryldy. Kezdesý barysynda Qazaqstandaǵy alǵashqy AES qurylysyna qatysty ózekti máseleler talqylandy: tańdalǵan reaktor tehnologııasy, jobanyń kestesi men qarjylandyrýy, óndiristi jergiliktendirý jáne kadr daıarlaý, sondaı-aq ıadrolyq jáne radıatsııalyq qaýipsizdiktiń joǵary standarttaryn qamtamasyz etý.

Forým aıasynda delegatsııa halyqaralyq kórmege bardy. Onda atom aptalyǵy qatysýshylarynyń zamanaýı reaktorlyq qondyrǵylary, qaýipsizdik sheshimderi jáne energetıkanyń ornyqty damýyna arnalǵan ınnovatsııalary usynyldy. Qazaqstandyq stend qonaqtardyń nazaryn aýdaryp, elimizdiń jetistikteri men beıbit atom salasyndaǵy perspektıvalyq jobalaryn kórsetti.

«Qazaqstandyq atom elektr stantsııalary» JShS-niń bas dırektory Ernat Berdiǵulov «Barlyǵy atomnan bastalady» atty plenarlyq sessııada sóz sóılep, atom energetıkasyn damytý boıynsha strategııalyq josparlardy tanystyrdy. Joba jetekshisi Jomart Jasanov dóńgelek ústel barysynda otandyq kásiporyndar men mamandardy tartý AES jobasyn tabysty iske asyrýdyń basty sharty ekenin atap ótti.

Qazaqstan ekologııalyq taza ári joǵary tehnologııalyq energııa kózderin damytý, energetıkalyq qaýipsizdikti nyǵaıtý jáne ornyqty ekonomıkalyq ósim baǵytyn ustanatynyn taǵy da rastady.

Dúnıejúzilik atom aptalyǵyna Eýropa, Azııa, Taıaý Shyǵys, Túrkııa, Belarýs, Bolıvııa, Iran, Qytaı jáne basqa da elderdiń ókilderi qatysty. Bul álemdik qaýymdastyqtyń atom energetıkasyn damytýǵa degen joǵary qyzyǵýshylyǵyn kórsetedi.