Qazaqstan Dúnıejúzilik poshta uıymynyń barlyq múshelik jeńildikterinen aıyrylýy múmkin
ASTANA. QazAqparat - Dúnıejúzilik poshta odaǵy 2014 jyldyń 1 shildesinen bastap Qazaqstanǵa beriletin barlyq múshelik jeńildikterdi toqtatýy múmkin.
Bul negizinen taǵaıyndalǵan operatordy aıqyndaýǵa qatysty máseleniń sheshilmeýine baılanysty týyndap otyr. Bul týraly búgin Májilistiń jalpy otyrysynda málim boldy.
Eske sala keteıik, otyrysta depýtattar Qazaqstan Respýblıkasynyń poshta baılanysy salasyndaǵy zańnamasynyń normalaryn Dúnıejúzilik poshta odaǵy aktileriniń normalarymen birizdendirý jáne poshta operatorlarynyń qyzmetterin retteýge baǵyttalǵan zań jobasyn talqylaǵan edi.
«Taǵaıyndalǵan operatordy aıqyndaýǵa qatysty máseleni Qazaqstannyń sheshpeýine baılanysty Dúnıejúzilik poshta odaǵy atynan EMS kooperatıvi 2014 jyldyń 1-inshi shildesinen bastap barlyq múshelik jeńildikterdi Qazaqstanǵa berýdi toqtatatyny týraly Ulttyq poshta operatoryn habardar etken. Bul Qazaqstan úshin EMS kooperatıviniń halyqaralyq júıesine qol jetkizýden aıyrýǵa ákep soǵady», delingen komıtet qorytyndysynda.
Al Májilis depýtaty Shavhat Ótemisovtiń aıtýynsha, 2008 jyly Dúnıjúzilik poshta odaǵynyń jarǵysy «taǵaıyndalǵan operator» termınimen tolyqtyrylǵan bolatyn. Bul sanatqa Dúnıejúzilik poshta odaǵyna múshelikke kez kelgen memlekettik nemese memlekettik emes uıym kire alady. «Olar óz aýmaǵynda poshta qyzmetin júzege asyrýdy qamtamasyz etip, Dúnıejúzilik poshta odaǵynyń aktileri men týyndap otyrǵan ózgeriske qatysty mindetterdi oryndaýy tıis»,- deıdi Sh. Ótemisov.
Onyń sózine qaraǵanda, konventsııaǵa sáıkes, oǵan múshe el alty aı ishinde Dúnıejúzilik poshta odaǵynyń aktilerin resmı túrde oryndaý úshin resmı túrde taǵaıyndalǵan operatordyń ataýy men mekenjaıy týraly Uıymǵa habardar etýi kerek. «Alaıda, búginge deıin Qazaqstannyń zańnamasynda taǵaıyndalǵan operatordy belgileý tártibin, onyń qyzmetine qoıylatyn talaptardy oryndaý sharttaryn belgileıtin normalar qamtylmaǵan», deıdi Sh. Ótemisov. Zań jobasy osyndaı olqylyqtardyń ornyn toltyrýǵa baǵyttalady.
Budan bólek, depýtattyq korpýs poshta operatorynyń qoljetimdiligin, jedeldilik pen udaıylyqtyń qajetti deńgeıin uıymdastyrýdy zań deńgeıinde qamtamasyz etýdi usynyp otyr.
