Qazaqstan dúnıeniń túkpir-túkpirindegi túıtkil men shıelenisterdi sheshýge belsene qatysýda
«Bizdiń beıbit ómir men qaýipsizdikti, yntymaqty damýdy kózdeıtin usynystarymyz keń dúnıede qoldaý taýyp keledi. Biz BUU-nyń Qaýipsizdik keńesiniń turaqty emes múshesi retinde óz mindetimizdi oryndaıtyn bolamyz. Jahandyq uıymnyń bedeldi organyna óńirimizdiń atynan ókildik etý biz úshin úlken mártebe bolyp sanalady. Elimiz dúnıeniń túpkir-túpkirindegi túıtkil men shıelenisterdi sheshýge belsene atsalysyp keledi. Solardyń biri - Sırııadaǵy ahýaldy beıbit jolmen retteý máselesi. Biz problemany tek kelissózder arqyly ǵana sheshýge bolady dep kámil senemiz. Sondyqtan Astanada Sırııa Úkimeti men qarýly oppozıtsııa ókilderi alǵash ret bir ústel basynda kezdesip, sóılesip, bir-birimen kelissózder júrgizdi», - dedi Memleket basshysy.
Qazaqstan Prezıdenti Elshilerdiń qaperine sanaýly kúnderden soń Astanada «Bolashaq energııasy» degen taqyryppen EKSPO-2017 halyqaralyq mamandandyrylǵan kórmesiniń ashylý rásimi ótetindigin eske salyp ótti.
«Oǵan álemniń 100-den astam eli qatysady. Sizderdiń elderińizdiń basshylarynyń barlyǵy meniń shaqyrýymdy aldy. Bul kórme adamzattyń búgingi ozyq jetistikterin kórsetip, olardy nasıhattaýǵa baǵyttalatyn bolady. Kórme aıaqtalǵannan soń onyń bazasynda «Astana» halyqaralyq qarjy ortalyǵy jumys isteıdi. Sizder EKSPO-2017 kórmesin ótkizýge belsene at salysady dep senemin jáne Astana halyqaralyq qarjy ortalyǵyna sizderdiń memleketterińizden qoldaý tabamyz dep úmittenemiz», - dedi Elbasy Elshilerge qarata.
Aıta keteıik, Memleket basshysyna Ońtústik Koreıa Elshisi Kım De Sık, Indonezııa Elshisi Rahmat Pramono, Rýmynııa Elshisi Chezar-Manole Armıaný, Serbııa Elshisi Vladan Matıch senim gramotasyn tabys etken bolatyn.