Qazaqstan DSU múshelerin álemdik azyq-túlik daǵdarysyn tezirek sheshýge shaqyrdy

NUR-SULTAN. QazAqparat - Álemdik jetkizilim tizbeginiń buzylýy, klımattyń ózgerýi, damýshy elderdegi halyqtyń ósýi azyq-túlik qaýipsizdigi máselelerin burynǵydan da ózekti etti, dep habarlaıdy QazAqparat Saýda jáne ıntegratsııa mınıstrligine silteme jasap.

«Álemniń barlyq elderi azyq-túlik baǵasynyń qarqyndy ósýine tap boldy, saýdadaǵy shekteýler azyq-túlik tapshylyǵy bar aımaqtar úshin jaǵdaıdyń odan ári shıelenisýine ákeledi. Bul taqyryp osy kúnderi Jenevada ótip jatqan Qazaqstan tóraǵasy bolyp tabylatyn DSU-nyń 12-shi Mınıstrlik konferentsııasynda nazardan tys qalǵan joq», - dep jazdy vedomstvo.

Qazaqstan delegatsııasynyń basshysy, QR Premer-Mınıstriniń orynbasary – Saýda jáne ıntegratsııa mınıstri Baqyt Sultanov Azyq-túlik qaýipsizdigi máselelerine arnalǵan sessııada saýda jáne azyq-túlik qaýipsizdigi jónindegi mınıstrlik deklaratsııasynyń jobasyn jáne Dúnıejúzilik azyq-túlik baǵdarlamasyn satyp alýǵa qatysty eksporttyq shekteýlerdi qoldanbaý týraly mınıstrlik sheshimin qabyldaýdyń mańyzdylyǵyn atap ótken. Bul sheshim, tipti mundaı ónimdi jekelegen elderden tys jerlerge áketýge tolyq tyıym salynǵan jaǵdaıda da, apatqa ushyraǵan óńirlerge azyq-túlik jetkizýdiń gýmanıtarlyq baǵdarlamalaryn júzege asyrýǵa múmkindik beredi.

Premer-Mınıstrdiń orynbasary – QR Saýda jáne ıntegratsııa mınıstri Baqyt Sultanov «DSU-nyń barlyq elderin Qazaqstannyń úlgisimen júrýge jáne osy konferentsııadan álemdik azyq-túlik daǵdarysyn sheshýge múmkindik beretin naqty nátıjelermen óz elderine oralýǵa shaqyramyn», - dedi óz sózinde.

aıta keteıik, DSU-nyń 12-shi Mınıstrlik konferentsııasy Álemdik saýda saıasatyndaǵy mańyzdy oqıǵa bolyp tabylady jáne Jenevada 15 maýsymǵa deıin jalǵasady.