Qazaqstan DSU-ǵa engennen keıin saýda kezindegi dıskrımınatsııalyq kedergilerden qutylady
ASTANA. 13 qańtar. QazAqparat - Qazaqstan DSU-ǵa engennen keıin uıymǵa múshe elderdegi saýda kezindegi dıskrımınatsııalyq jaǵdaıdan qutylady.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Ekonomıka jáne bıýdjettik josparlaý vıtse-mınıstri Tımýr Jaqsylyqov aıtty. DSU-ǵa kirgennen keıingi elimizdiń júkterin tasymaldaý ahýalyna toqtalǵan ol, «bizdiń boljam boıynsha DSU- ǵa múshe memleketterdiń naryqtary biz úshin qoljetimdi bolady. Atap aıtqanda saýda kezinde bizdiń tarapymyzǵa dıskrımınatsııalyq jaǵdaılar qoldanylmaıtyn bolady. Sonymen qatar bul osy memleketterdiń aýmaǵymen bizdiń taýarlardy tasymaldaý talaptaryna da qatysty»,- dedi ol. Osy oraıda ol Qazaqstannyń atalǵan uıymǵa qosylýy boıynsha belsendi kelissózder kóp jyldardan beri júrip jatqandyǵyn jáne bunyń úderisi aıaqtalýǵa jaqyndaǵanyn sóz etti. Aıta keteıik, uıymǵa kirýdiń kelissózderi birneshe baǵyttarda júrýde. «Bul taýarlar men qyzmetter, aýyl sharýashylyǵy jáne júıelik máseleler turǵysyndaǵy ekijaqty kelissózder. Búginde taýarlar men qyzmetter, júıelik máseleler, sondaı-aq aýyl sharýashylyǵy boıynsha kelissózder aıaqtalyp qaldy. Endi DSU-ǵa Qazaqstannyń qosylýy kezindegi tarıftik úılesimdilikke jáne jergilikti qamtýǵa baılanysty eki másele qaldy. Bul sharalar da aıaqtalýǵa jaqyndady. Bizdiń paıymymyzsha, bıyl kelissózderdi támamdap, DSU-ǵa enýge barlyq múmkindikteri bar», - dep túıdi vıtse-mınıstr.
