Qazaqstan DSU erejelerine qosyldy: Eldiń ınvestıtsııalyq tartymdylyǵy artady
ASTANA. KAZINFORM – Búgin Quryltaı otyrysynda «1994 jylǵy 15 sáýirdegi Dúnıejúzilik saýda uıymyn qurý týraly Marrakesh kelisimine Qazaqstan Respýblıkasynyń qosylýy týraly hattamaǵa qosymsha bolyp tabylatyn Kórsetiletin qyzmetter boıynsha Qazaqstan Respýblıkasynyń erekshe mindettemeleriniń tizbesine ózgeristerdi ratıfıkatsııalaý týraly» Zań ekinshi oqylymda qabyldandy.
Qujat boıynsha baıandama jasaǵan depýtat Dınara Raıhanovanyń atap ótýinshe, Quryltaı otyrysynda zań jobasynyń negizgi erejeleri, onyń maqsattary men mindetteri, sondaı-aq zań qabyldanǵan jaǵdaıda týyndaıtyn áleýmettik-ekonomıkalyq jáne quqyqtyq saldary talqylandy.
- Aıta ketý kerek, Qazaqstan Respýblıkasy 2015 jylǵy 30 qarashadan bastap Dúnıejúzilik saýda uıymynyń tolyqqandy múshesi sanalady jáne onyń aıasynda halyqaralyq saýda protsesteriniń belsendi qatysýshysy retinde ornyqty, - dedi ol.
Quryltaı depýtatynyń atap ótýinshe, zań jobasy kelesideı maqsattarǵa baǵyttalǵan:
- qyzmetter naryǵynda teń jaǵdaılardy qamtamasyz etý;
- ruqsat qujattaryn berýdiń biliktilik talaptary men merzimderin belgileýdegi ashyqtyqty arttyrý;
- qyzmetter naryǵyn memlekettik retteýdi jetildirý;
- Dúnıejúzilik saýda uıymyna múshe memlekettermen yntymaqtastyq aıasynda otandyq qyzmet kórsetýshiler úshin jańa múmkindikter qalyptastyrý.
- Dúnıejúzilik saýda uıymy erejelerine qosylý - Qazaqstannyń ınvestıtsııalyq tartymdylyǵyn arttyrýǵa, ınvestorlardyń senimin nyǵaıtýǵa jáne básekege qabiletti qyzmetter naryǵyn damytýǵa baǵyttalǵan mańyzdy qadam, - dedi Dınara Raıhanova.
Aıta keteıik, otyrysta depýtattar qylmyspen kúres, memleketaralyq izdestirý jáne kıberqylmysqa qarsy is-qımyl salalaryndaǵy yntymaqtastyqqa qatysty zań jobalaryn talqylap jatyr.
