Qazaqstan DSU-da qyzmet kórsetý salasyn ishki retteý kelissóziniń aıaqtalýyn qoldady

JENEVA. QazAqparat – Álemdik saýdanyń 90 paıyzyn quraıtyn Dúnıejúzilik saýda uıymyna múshe 67 el qyzmet kórsetý salasyndaǵy ishki retteý jónindegi jańa qaǵıdalardy qabyldady, dep habarlaıdy QazAqparat.

Bul oqıǵa - uıym úshin tarıhı mańyzdy, sebebi jańa qaǵıdalardyń qabyldanýy DSU-nyń sońǵy 20 jyldaǵy qyzmet kórsetý salasyndaǵy mańyzdy jetistigin bildiredi.

DSU Bas dırektory Ngozı Okondjo-Iveala óziniń kirispe sózinde DSU kelissózderine qatysýshy elderge álemdik saýdanyń serpindi jáne tez damyp kele jatqan segmentiniń múddelerine jaýap beretin qyzmet kórsetý salasyndaǵy nátıjege qol jetkizgeni úshin alǵys aıtty. DSU men EYDU zertteýlerine sáıkes, osy Qaǵıdalardy iske asyrý qyzmet kórsetetin kompanııalarǵa jyl saıyn 150 mıllıard AQSh dollar kóleminde paıda ákeledi.

Qazaqstannyń Turaqty ókili Janar Aıtjanova óz sózinde Qazaqstannyń JІÓ qyzmet kórsetý sektorynyń úlesi 56% quraıtynyn, sondyqtan bul sektor ártaraptandyrý jáne ekonomıkany pandemııadan keıingi qalpyna keltirý úshin mańyzdy ekenin atap ótti.

QR Turaqty ókili J.Aıtjanova sondaı-aq DSU-nyń osy qaǵıdalary áıelderdiń qyzmet kórsetý salasyndaǵy ekonomıkalyq quqyqtary men múmkindikterin keńeıtý úshin jańa múmkindikterdi qamtamasyz etetinin atap ótti.

Osyǵan baılanysty otyrysqa qatysýshylardy Qazaqstan Respýblıkasynyń Prezıdenti Qasym-Jomart Toqaevtyń bastamasymen júrgizilip jatqan áıelderge áleýmettik jáne ekonomıkalyq qoldaýdy nyǵaıtý jónindegi reformalary týraly habardar etti.

Osy reformalardy iske asyrý aıasynda Qazaqstannyń halyqaralyq mindettemelerine sáıkes áıelder úshin tyıym salynǵan kásipter tizbesin alyp tastaý kózdeledi.

DSU-nyń jańa Qaǵıdalary Qazaqstannyń DSU-ǵa kirý kezinde qabyldaǵan mindettemelerine sáıkes keletinin, olar lıtsenzııalaýdyń transparenttiligin qamtamasyz etýge, ruqsat berý rásimderi men qyzmet kórsetý salasyndaǵy talaptardy jeńildetýge baǵyttalǵanyn atap ótken jón.

QR DSU-ǵa kirgen sátten bastap Qazaqstan ekonomıkasyna tikeleı sheteldik ınvestıtsııalardyń jalpy kóleminiń 30%-y qyzmetterdiń negizgi sektorlaryn damytýǵa baǵyttalǵan.

Qyzmetter kórsetýdiń qosylǵan qunynyń álemdik JІÓ-ge qosqan úlesi 60%-dy quraıdy jáne qyzmet kórsetý salasy búkil álemde jumyspen qamtýdyń 50%-dan astamyn qamtamasyz etedi.

2018 jyldan bastap Qazaqstan DSU-nyń qyzmetter naryǵyna qol jetkizý boıynsha jahandyq kelissózderin basqarady.