Qazaqstan DSU aıasynda munaıgaz salasyndaǵy jergilikti qamtý jeńildikterin 2020 jylǵa deıin saqtap qalýǵa múddeli - J. Aıtjanova
ASTANA. 18 qarasha. QazAqparat - Qazaqstan DSU aıasynda munaıgaz salasyndaǵy jergilikti qamtý jeńildikterin 2020 jylǵa deıin saqtap qalýǵa múddeli.
Búgin Parlament Májilisindegi Úkimet saǵatynda Ekonomıkalyq ıntegratsııa isteri mınıstri Janar Aıtjanova osylaı málim etti.
«DSU aıasyndaǵy kelissózderdiń mańyzdy bóligi Qazaqstannyń munaı, gaz jáne taý-ken ónerkásibinde jumys istep jatqan ınvestorlarmen qol qoıylǵan kelisimderindegi otandyq taýarlardy satyp alý talaby boıynsha júrgizilýde. Búgingi tańda munaıgaz jáne taý-ken salasynda 564 ınvestıtsııalyq kelisimshartqa qol qoıylǵan bolatyn, osy kelisimsharttardyń sheńberinde sheteldik jáne otandyq ınvestorlar ózderiniń mindettemelerin júzege asyryp jatyr. Osy boıynsha satyp alynatyn qazaqstandyq taýarlardyń ortasha eseptegi kólemi 13 paıyz shamasynda bolyp tabylady», deıdi mınıstr J. Aıtjanova.
Mınıstrdiń aıtýynsha, atalǵan kelisimsharttar negizinde qazaqstandyq óndirýshiler jeńildikterdi paıdalanýda. «Bul jeńildikterdi saqtap qalý boıynsha biz 2020 jylǵa deıin ony memleket tarapynan qoldaný úshin kelissózder júrgizip jatyrmyz», - dedi mınıstr.
