Qazaqstan DSU aldyndaǵy saýda rásimderin jeńildetý mindettemelerin tolyq oryndady
ASTANA. KAZINFORM — Bul týraly Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken Saýda rásimderin jeńildetý jónindegi ulttyq komıtettiń otyrysynda aıtyldy. Bul týraly Úkimet habarlady.
2025 jyly Qazaqstan saýda rásimderin jeńildetý baǵytynda aýqymdy ári júıeli jumys júrgizdi. Atap aıtqanda, Dúnıejúzilik saýda uıymynyń Saýda rásimderin jeńildetý týraly kelisimi aıasynda ózine alǵan barlyq halyqaralyq mindettemeler tolyq kólemde oryndaldy. Bul – aqparattyń jarııalylyǵy men oǵan qoljetimdilikti qamtamasyz etý, taýarlardy shyǵarý merzimin qysqartý, kedendik retteýge halyqaralyq standarttardy engizý, «bir tereze» qaǵıdatyn qoldaný, sondaı-aq tranzıt erkindigin qamtamasyz etý sekildi mańyzdy baǵyttardy qamtıdy.
Mindettemelerdiń 100% oryndalýyna qaramastan, Qazaqstan 2025 jyly da otandyq syrtqy ekonomıkalyq qyzmetke qatysýshylar úshin saýda jáne kedendik rásimderdi odan ári ońtaılandyrý jáne jeńildetý jumysyn jalǵastyrdy. Bul baǵyttaǵy negizgi basymdyq tsıfrlandyrýǵa berildi. Atap aıtqanda, «Keden» kedendik aqparattyq júıesi engizilip, onyń fýnktsıonaly keńeıtildi, tranzıttik, poshta, jolaýshylar jáne ruqsat berý rásimderi tolyqtaı avtomattandyryldy. Sonymen qatar «CarGoRuqsat» elektrondyq kezek júıesin damytý jalǵastyrylyp, bul ótkizý pýnktteriniń ótkizý qabiletin arttyrýǵa jáne shekaradaǵy kútý ýaqytyn edáýir qysqartýǵa múmkindik berdi. Ótkizý pýnktteri jańǵyrtylyp, temirjol tranzıtine kedendik baqylaý rásimderi avtomattandyryldy, sondaı-aq navıgatsııalyq plombalar engizildi.
Syrtqy ekonomıkalyq qyzmetke qatysýshylardyń múddelerin qamtıtyn sharalardy júıeli túrde jetildirý Qazaqstannyń tsıfrlyq jáne qaǵazsyz saýda úderisterine negizdelgen zamanaýı tranzıttik hab retindegi pozıtsııasyn nyǵaıta túsýde.
Otyrys barysynda Astana qalasynda saýda rásimderin jeńildetý jónindegi ekinshi ulttyq baıandamanyń tanystyrylymy sátti ótkeni de aıtyldy. Atalǵan baıandamada Transkaspıı halyqaralyq kólik baǵytyna (orta dáliz) erekshe nazar aýdarylyp, Qazaqstannyń tsıfrlyq, ınfraqurylymdyq jáne ekologııalyq sheshimderdi syrtqy saýda júıesine ıntegratsııalaýdaǵy ózindik modeliniń qalyptasýy kórsetildi.
Aıta ketelik Premer-mınıstr Oljas Bektenovtiń tóraǵalyǵymen Qazaqstan Respýblıkasy Prezıdenti janyndaǵy «Jasyl ekonomıkaǵa» kóshý jónindegi keńestiń otyrysy ótken edi.