Qazaqstan Doing Business reıtıngisinde 50-orynǵa kóterildi - DB málimdemesi
ASTANA. 29 qazan. QazAqparat - Jyl saıyn Dúnıejúzilik bank (DB) pen Halyqaralyq qarjy korporatsııasy (IFC) jasaıtyn «Doing Business-2013» reıtıngisinde Qazaqstan 189 eldiń ishinen 53-orynnan 50-orynǵa kóterildi. Bul týraly Dúnıejúzilik bank málimdemesinde habarlandy, dep jazady primeminister.kz.
DB málimetine sáıkes, bir jyl ishinde Qazaqstan qurylysqa ruqsat alý (4 saty joǵarylap, 145-oryn), menshikti tirkeý (9 saty joǵarylap, 18-oryn) jáne tólem qabiletsizdigin sheshý (1 satyǵa joǵarylap, 54-oryn) sııaqty salalarda oń nátıjelerge jetti.
Bıznes júrgizý úshin eń qolaıly jaǵdaı jasalǵan elder tizimin Sıngapýr bastap keledi. Sonymen qatar, bıznesti retteýdiń jaǵymdy jaǵdaılary qalyptasqan 10 eldiń tizimine Gonkong, Jańa Zelandııa, AQSh, Danııa, Malaızııa, Ońtústik Koreı, Grýzııa, Norvegııa jáne Ulybrıtanııa endi.
Postkeńestik elder arasynda reıtıng boıynsha burynǵysha tizimdi Grýzııa (8-oryn) bastap tur, odan keıin Lıtva (17-oryn), Estonııa (22-oryn), Latvııa (24-oryn), Armenııa (37-oryn), Qazaqstan (50-oryn), Belorýssııa (63-oryn), Qyrǵyzstan (68-oryn), Ázirbaıjan (70-oryn), Moldavııa (78-oryn). Reıtıng boıynsha Reseıden tómen Ýkraına (112), Tájikstan (143), Ózbekstan (146) ornalasqan.
