Qazaqstan «Doing Business» reıtınginiń elektrmen jabdyqtaý baǵytynda kórsetkishin jaqsartty
TALDYQORǴAN. QazAqparat - Qazaqstan «Doing Business» reıtınginiń elektrmen jabdyqtaý baǵytynda kórsetkishin jaqsartty. Bul týraly óńirlik Kásipkerler palatasynda ótken basqosýda Atom jáne energetıkalyq baqylaý men qadaǵalaý komıtetiniń Almaty oblysy boıynsha departament dırektory Marat Úlekov málim etti, dep habarlaıdy QazAqparat tilshisi.
Aıta keteıik, jıyn kásipkerlik nysandaryn elektrmen qamtý jelilerine qosý úderisteri men zańnama erejelerin túsindirýge arnalǵan bolatyn.
«Dúnıejúzilik banktiń «Doing Business» halyqaralyq reıtınginde «Elektrmen jabdyqtaý júıesi jelilerine qosylý» ındıkatory boıynsha Qazaqstan 75-orynǵa turaqtaǵan. Bul kórsetkish 2015 jylmen salystyrǵanda áldeqaıda joǵary, naqtyraq aıtqanda 25 satyǵa kóterilgen. Mundaı oń nátıjelerdi elektr energetıkasy salasyndaǵy zańdarǵa engizilgen ózgertýlermen baılanystyrýǵa bolady. Jalpy elimizde kásipkerlikti damytýǵa meılinshe jaǵdaı jasalýda. «Doing Business» halyqaralyq reıtınginde Qazaqstan barlyq kórsetkishterdi qosa alǵanda 190 eldiń ishinen 35-shi oryndy ıelendi», - dedi Murat Úlekov.
Onyń aıtýynsha, kásipkerlik kedergilerin joıý maqsatynda birqatar jeńildikter qarastyrylǵan. Atap aıtqanda, elektrmen jabdyqtaý jelilerine qosý barysynda kásipker úshin ruqsat berý protsedýrasynyń ekeýi alynyp tastalǵan. Budan bólek, júıege qosylýǵa qajet tehnıkalyq talaptardy berý merzimi men elektrmen jabdyqtaý mekemesi jáne tutynýshy arasyndaǵy jobaǵa qatysty sheshim qabyldaý merzimi qysqartylǵan.
«Sonymen birge, qazirgi tańda bar-joǵy úsh kúnniń ishinde, energııany jetkizýshi jabdyqtaýshy mekememen jobalyq sheshimderdi maquldaýǵa jáne elektr energııasyn jetkizý týraly kelisimshartqa otyrýǵa bolady. Buǵan deıin, atalǵan protsedýralardyń barlyǵy 20 kúnnen 7 kúnge deıingi aralyqty qamtyǵan edi. Sol sııaqty elektr jelilerine qosylýǵa ruqsat berý talaby alynyp tastaldy. Ony buǵan deıin memlekettik energetıkalyq baqylaý jáne qadaǵalaý organy berip kelgen edi», dedi departament basshysy.
