Qazaqstan «Doing Business» reıtıngi «qurylysqa ruqsat alý» ındıkatorynda 53 tarmaqqa joǵary bolýy tıis edi
Árıne, jıyn barysynda elimizdiń «Doing Business» reıtıngisinde 49-shy orynǵa kóterilip, «kásiporyndardy tirkeý», «tólem qabiletsizdigine ruqsat», «nesıe alý» syndy ındıkatorlarda birshama alǵa ilgerilegendigimen qatar «qurylysqa ruqsat alý» jáne «halyqaralyq saýda» kórsetkishterinde keıinge qalyp otyrǵandyǵy da keńinen sóz boldy.
Máselen, QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokınniń atap ótýinshe, 2012 jyldyń mamyrynda túzilgen «Doing Business 2013» reıtınginde Qazaqstan «qurylysqa ruqsat alý» ındıkatorynda 155-shy orynǵa turaqtaǵan. Bul kórsetkishi 2008 jyly 177-shi, al 2012 jyly 150-shi oryn bolatyn. Degenmen, elimizdiń 1 jylda ilgeri emes 5 satyǵa keıin ketý jaıyn túsindirgen S.Nokınniń paıymynsha, reıtıngti aıqyndaý barysynda 2011-2012 jyldary elimizde qurylys salasynda qabyldanǵan ruqsat berý protsedýralaryn qysqartý sharalary eskerilmegen. Atalǵan kezeńde jer telimin qurylysqa paıdalanýǵa ruqsat qaǵazyn usyný talaby, nysannyń paıdalanýǵa berilýin qabyldaý aktisin bekitý protsedýrasy, qabyldaý komıssııasy nysandy paıdalanýǵa qabyldaý barysynda jumys komıssııasynyń qajettiligi, óziniki bolǵan jaǵdaıda kelesi taraptan tehnıkalyq qadaǵalaý tartý alynyp tastalǵan bolatyn.
«Atalǵan ózgeristerdi eskerer bolsaq, ruqsat alý ýaqyty 53 kúnge, al protsedýra quny 800 myń teńgege tómender edi. Bul oraıda Qazaqstannyń «Doing Business-2013» reıtıngindegi ustanymy joǵarylap, ıaǵnı 53 tarmaqqa jaqsaryp, 155-shi orynnan 102-shi orynǵa kóteriler edi. Biraq ta «Doing Business 2013» reıtınginde bul ózgertýler eskerilmedi. Bizdiń paıymymyzsha, olar «Doing Business 2014» reıtıngin túzý barysynda qaperge alynatyn shyǵar», - dedi agenttik basshysy.
Jalpy, S.Nokınniń sózine qaraǵanda, elimizde qurylys salasyndaǵy ákimshilik kedergilerdi barynsha tómendetýge baǵyttalǵan jumystar óz jalǵasyn tabýda. Atap aıtqanda, nysandy paıdalanýǵa berý kezinde komıssııamen qabyldap alý protsedýrasyn alyp tastaý usynysy bar. Al onyń ornyna nysandy paıdalanýǵa ruqsat berýde «jalǵyz tereze» qaǵıdaty tetigin engizý josparlanǵan. Bul ótinish berýshini túrli ınstantsııanyń ondaǵan kelisim alý úshin arly-berli sabylyp júrýinen aryltady. Degenmen bul rette aıta keterligi, tapsyrys berýshiniń, merdigerdiń, tehnıkalyq jáne avtorlyq qadaǵalaýdyń jeke jaýapkershilikteri belgilenedi.
2013 jylǵa arnalǵan «Doing Business» reıtıngi ındıkatorlaryn jaqsartý sharalarynyń bekitilgen keshendi jospary aıasynda da jumystar jalǵasýda. Agenttik basshysynyń sózine qaraǵanda, atalǵan josparda jobalyq-smetalyq qujattardy salalyq memlekettik organdarmen mindetti kelisý talabyn alyp tastaý usynysy qarastyrylýda. Al qurylys jobasynyń sanıtarlyq, órtke qarsy jáne ekologııalyq talaptarǵa saı ekendigin tekserý tek memlekettik saraptama organdarymen ǵana júrgizilmek. «Atalǵan tarmaq boıynsha bizder barlyq protsedýralarǵa saraptama júrgizdik jáne de usynysymyzdy Ekonomıkalyq damý jáne saýda mınıstrligine jiberdik», - dedi ol.
Sonymen qatar aldaǵy ýaqytta sáýlettik-josparlaý tapsyrmalaryn berý merzimi tehnıkalyq shartyn berý merzimimen sáıkestendirý týraly usynys ázirlenedi. Qurylys nysandaryn josparlaý úshin shyǵys materıaldaryn rásimdeý jáne berý erejesine saı sáýlettik-josparlaý tapsyrmalaryn berýge arnalǵan ótinim men tehnıkalyq shartyn qaraý merzimi 8 kúnnen, al tehnıkalyq oryndalýy kúrdeli nysandarda 15 kúnnen aspaýy tıis. Osyǵan oraı Qurylys jáne turǵyn úı-kommýnaldyq sharýashylyq isteri agenttigi Indýstrııa jáne jańa tehnologııalar, Munaı jáne gaz, Kólik jáne kommýnıkatsııa mınıstrlikterimen birlesip, ınjenerlik qatamasyz etý kózderine qosylýǵa arnalǵan tehnıkalyq sharttardy alý protsedýralaryn jetildirý boıynsha usynystar ázirlep otyr. Іs-sharalar josparyna sáıkes ózgerister aǵymdaǵy jyldyń 2 toqsanynyń sońyna deıin engiziledi dep josparlanǵan.
«Sondaı-aq jer telimine quqyq berý protsedýrasyn jetildirý boıynsha usynystar ázirleý qajet. Jer kodeksiniń 43-babyna sáıkes jer telimin berýge arnalǵan ótinimdi qaraýdyń jalpy merzimi 2 aıǵa deıingi ýaqytty quraıdy. Biraq jerge nysan salý jobasyn ázirleýdiń naqty merzimi bolmaýy saldarynan bul máseleniń sheshimi 6 aıdan bastap odan da uzaq merzimge sozylýy da múmkin. Bul máselege qatysty biryńǵaı pikir qalyptasqan jaǵdaıda nysan salý úshin jer telimine quqyq berý protsesin 1,5 aıǵa deıin qysqartýǵa bolady», - dedi S.Nokın.
Agenttik basshysynyń atap ótýine qaraǵanda, Dúnıejúzilik banktiń «Doing Business» reıtıngi jáne ony Úkimettiń tapsyrmasyna saı jaqsartýǵa baǵyttalǵan jumystar qurylys naryǵynyń damýyna bóget bolyp otyrǵan shynaıy kedergilerdi anyqtap, olardy joıýǵa zor múmkinshilik beredi.
