Qazaqstan Dohadaǵy dúnıejúzilik sammıtte áleýmettik damý salasyndaǵy bastamalardy tanystyrdy
ASTANA. KAZINFORM — Qazaqstan Dohada ótken Áleýmettik damý jónindegi ekinshi dúnıejúzilik sammıtte áleýmettik saıasat jáne halyqaralyq yntymaqtastyq salasyndaǵy basymdyqtardy tanystyrdy. Bul týraly Úkimettiń baspasóz qyzmeti habarlady.
Premer-mınıstrdiń orynbasary — Úkimet Apparatynyń basshysy Ǵalymjan Qoıshybaev bastaǵan qazaqstandyq delegatsııa Qatar Memleketiniń astanasy Doha qalasynda ótken Áleýmettik damý jónindegi ekinshi dúnıejúzilik sammıtke qatysty.
Іs-sharaǵa joǵary deńgeıdegi 180 ókil, onyń ishinde memleketter men úkimetter basshylary, mınıstrler, halyqaralyq uıymdardyń ókilderi qatysty. Sammıt jumysyna akademııalyq jáne isker toptar, úkimettik emes uıymdar da qosyldy. Sammıttiń basty maqsaty — jahandyq áleýmettik máselelerdi sheshý, sondaı-aq áleýmettik ornyqtylyq sharalaryn nyǵaıtý, ınklıýzıvti ekonomıkalyq ósýdi qamtamasyz etý jáne BUU-nyń ornyqty damý maqsattaryna qol jetkizý jónindegi strategııalardy talqylaý jáne ázirleý.
Qazaqstan delegatsııasynyń basshysy plenarlyq otyrysta sóılegen sózinde áleýmettik damý turaqty ári ádiletti álemniń negizi ekenin atap ótti. Ol Qazaqstan Respýblıkasynyń Prezıdenti Qasym-Jomart Toqaevtyń basshylyǵymen elimizde azamattardyń ál-aýqatyn jaqsartýǵa, teń múmkindikterdi qamtamasyz etýge jáne áleýmettik ádilettilikti nyǵaıtýǵa baǵyttalǵan keń aýqymdy saıası jáne ekonomıkalyq reformalar júzege asyrylyp jatqanyn atap ótti.
Premer-mınıstrdiń orynbasary Qazaqstannyń jańa tehnologııalardy paıdalaný salasyndaǵy óńirlik kóshbasshylyǵyn atap ótip, elimizdiń ekonomıkalyq ósýin qoldaý jáne azamattardyń ómir súrý sapasyn arttyrý maqsatyndaǵy ınnovatsııalar men tsıfrlandyrý salasyndaǵy basymdyqtarymen bólisti.
Ǵalymjan Qoıshybaev Qazaqstan Respýblıkasynyń Birikken Ulttar Uıymy Jarǵysynyń maqsattary men qaǵıdattaryna, halyqaralyq yntymaqtastyqqa jáne ádildik pen adamı qadir-qasıetke negizdelgen bolashaqty qurýǵa beıildiligin rastady.
Sammıt aıasynda Qatar Memleketiniń Premer-mınıstri — Syrtqy ister mınıstri sheıh Muhammed ben Abdýlrahman Ál Tánımen ekijaqty kelissózder ótti. Kezdesý barysynda taraptar Qazaqstan-Qatar qatynastarynyń strategııalyq sıpatyn atap ótip, energetıka, telekommýnıkatsııa jáne basqa da salalardaǵy birlesken ınvestıtsııalyq jobalardy júzege asyrýdy qosa alǵanda, ekijaqty ózara is-qımyldyń ózekti máselelerin talqylady. Prezıdent Qasym-Jomart Toqaevtyń 2024 jylǵy aqpandaǵy Qatarǵa memlekettik sapary barysynda qol jetkizilgen ýaǵdalastyqtardy júzege asyrýǵa erekshe nazar aýdaryldy.
Sapar aıasynda Ǵalymjan Qoıshybaev Qatardyń baılanys jáne aqparattyq tehnologııalar mınıstri Muhammed ben Álı Ál-Manaıımen kezdesý ótkizdi, onda tsıfrlandyrý, telekommýnıkatsııalyq ınfraqurylym salasyndaǵy yntymaqtastyq, sondaı-aq elektrondyq úkimet salasyndaǵy tájirıbe almasý perspektıvalary talqylandy.
Qatar tarapyna jasandy ıntellekt salasynda júzege asyrylyp jatqan jobalar da usynyldy. Kezdesý qorytyndysy boıynsha taraptar osy baǵyttaǵy ózara is-qımyldy kúsheıtýge kelisti.
Sonymen qatar qazaqstandyq delegatsııa basshysy Power International Holding kompanııasynyń tóraǵasy Moýtaz Ál-Haıatpen jumys babyndaǵy kelissózder júrgizip, onyń barysynda Qazaqstanda holdıngtiń jobalaryn júzege asyrý, sondaı-aq yntymaqtastyqty odan ári keńeıtý máseleleri talqylandy.
Aıta ketelik álem kóshbasshylary áleýmettik damýdy jedeldetýge baǵyttalǵan Doha deklaratsııasyn qabyldaǵan edi.