Qazaqstan ShYU jumysyna belsene atsalysady - Prezıdent
AShHABAD. KAZINFORM — Prezıdent VIIІ Álemdik jáne dástúrli dinder kóshbasshylarynyń Sezi aıasynda kóterilgen «Beıbitshilik qozǵalysy» bastamasynyń mańyzyna toqtaldy. Bul týraly Aqordanyń baspasóz qyzmeti málim etti.
Qasym-Jomart Toqaevtyń aıtýynsha, elimiz dinaralyq, etnosaralyq jáne jáne mádenıetaralyq dıalogty nyǵaıtýǵa aıryqsha nazar aýdarady. Bul oraıda Prezıdent Qazaqstanda 20 jyldan astam ýaqyttan beri Álemdik jáne dástúrli dinder kóshbasshylarynyń sezi uıymdastyrylyp kele jatqanyn eske saldy.
— Taıaýda Astanada ótken VIIІ Sezde Qazaqstan «Beıbitshilik qozǵalysy» dep atalatyn bastama kóterdi. Bul shyn máninde qantógisti toqtatýǵa, keleshek urpaq aldyndaǵy ortaq jaýapkershilikti sezine otyryp, bitimge kelý jolyn izdeýge úndeý edi. Qazaqstan ShYU jumysyna belsene atsalysady. Bul — Eýrazııadaǵy qaýipsizdik pen senim sharalaryn qamtıtyn, kópjosparly ári konstrýktıvti kún tártibi bar bedeldi jáne tabysty uıym. Jahandaǵy progress pen turaqtylyqtyń negizgi kepili — ornyqty áleýmettik-ekonomıkalyq damý. Geosaıası shıelenistiń órshýi, halyqaralyq sanktsııalardyń kóbeıýi, saýda tizbeginiń buzylýy, tehnologııalyq báseke sekildi kóptegen faktordyń saldarynan álem ekonomıkasy kúrdeli syn-qaterlerge tap boldy. Jahandyq ekonomıkanyń qarqyny báseńdedi. Qýanyshymyzǵa oraı, munyń áseri Ortalyq Azııaǵa tıe qoıǵan joq. Barlyq elde aıtarlyqtaı ósim baıqalady. Mysaly, Qazaqstannyń ekonomıkalyq ósimi bıyl 6 paıyzdan asty. Іshki jalpy ónim kólemi 300 mıllıard dollar mejesin eńseredi. Bul jan basyna shaqqanda 15 myń dollardan artyq, — dedi Prezıdent.
Qasym-Jomart Toqaev Ortalyq Azııa elderi kólik-tranzıt áleýetin kúsheıtip jatqanyna toqtaldy. Eń aldymen, Shyǵys pen Batys, Soltústik pen Ońtústik arasyndaǵy baılanysty nyǵaıtýǵa basa mán beriledi. Prezıdent Qazaqstan Transkaspıı halyqaralyq kólik baǵdarynyń múmkindikterin dáıekti túrde keńeıtip, temirjol, port, avtojol ınfraqurylymyn jańǵyrtyp jatqanyn, osylaısha birtutas transport júıesin qalyptastyrýǵa kiriskenin jetkizdi.
Memleket basshysy elimiz Ortalyq Azııanyń kólik júıesin damytýdyń keshendi strategııasyn ázirleýge belsendi atsalysyp jatqanyna nazar aýdardy. Maqsat — ornyqty logıstıka baǵyttaryn tolyq iske qosý.
Budan buryn Memleket basshysy Aýǵanstanǵa kómek kórsetýdi jalǵastyrý qajet dep esepteıtinin aıtty.
Sonymen qatar Qazaqstan Ýkraınadaǵy qaqtyǵysty retteý boıynsha kelissózdiń jandanýyna qoldaý bildiretinin alǵa tartty.