Qazaqstan dıplomattary Reseı áýejaıynda otandastarymyzǵa merekelik kóńil-kúı syılady
NUR-SULTAN. QazAqparat - Qazirgi ýaqytta Máskeý áýejaılarynda Vetnam, Domınıkan Respýblıkasy, Taıland, Kýba, Shrı-Lanka elderinen ushyp kelgen 156 qazaqstandyq azamat jınalyp qaldy.
Bul jaıynda Qazaqstannyń Reseıdegi Elshiliginiń baspasóz qyzmetinen málim etti, dep habarlaıdy QazAqparat tilshisi.
Álemdi jaılaǵan koronavırýs indetine baılanysty Reseıdiń barlyq áýejaılarynda sheteldik jolaýshylar úshin ushyp kelý jáne ushyp ketýde qıyndyq týyndap otyr. Olardyń qatarynda ózge elderden Reseı arqyly Qazaqstanǵa oralmaq bolǵan Qazaqstan azamattary bar.
Osy ýaqytqa deıin qazaqstandyq dıplomattardyń járdemimen 105 azamat týǵan jerine oraldy. Degenmen, Reseı áýejaılaryna kelip jatqan qazaqstandyqtar áli de bar. Aıtalyq, 30 naýryzǵa deıin reseılik áýejaılarǵa shamamen 500 qazaqstandyq jolaýshy keletindigi kútiledi.
«Degenmen, mundaı qıyn-qystaý sátterge qaramastan kóńil kóterýge de múmkindik tabylady. Máskeý áýejaılarynda kúni-túni kezekshilik etip júrgen Qazaqstannyń Reseıdegi Elshiliginiń qyzmetkerleri otandastaryn ystyq tamaqpen jáne sýmen ǵana qamtamasyz etip qoımaı, olar úshin shaǵyn ǵana Naýryz merekesin uıymdastyryp berdi», - dep atap ótedi Elshilikten.
