Qazaqstan dıplomattary Taıaý Shyǵystan evakýatsııalanbaıdy — SІM

ASTANA. KAZINFORM — Syrtqy ister mınıstriniń birinshi orynbasary Erjan Ashyqbaev Qazaqstannyń dıplomattary Taıaý Shyǵys elderindegi jumysyn jalǵastyratynyn aıtty. 

Onyń sózine qaraǵanda, atalǵan óńirden konsýldyq qyzmetkerleriniń otbasy músheleri men balalary evakýatsııalanǵan. Dıplomattardyń ózderi sol jerde qalady.

— Dıplomattar óz jumystaryn jalǵastyryp jatyr, óıtkeni olardyń kómegine júginetinder az emes. Meniń oıymsha, bizdiń dıplomattar men konsýldar jumysyn óte jaqsy kórsetip otyr. El azamattary olarǵa alǵystaryn aıtyp jatyr. Memleket basshysy mundaı daǵdarys jaǵdaıynda el azamattarynyń qaýipsizdigine basymdyq beredi jáne Syrtqy ister mınıstrligi óz jumysyn atqaryp keledi, — dedi Erjan Ashyqbaev Parlament Májilisinde tilshiler suraǵyna jaýap bere otyryp.

Sonymen qatar ol dıplomatııalyq ókildikterdiń qaýipsizdigi máselesine erekshe nazar aýdarylyp otyrǵanyn atap ótti.

— Ózderińiz bilesizder, sheteldegi elshilikterimiz jáne bas konsýldyqtarymyz — ol dıplomattarymyzdyń jumys orny. Bul nysandarda belgili bir aqparat saqtalady. Sondyqtan ol elderdegi mekemelerdi qorǵaý syrtqy saıası vedomstvo úshin basymdyq sanalady, — dedi mınıstrdiń orynbasary.

Aıta keteıik, Qazaqstannyń memlekettik organdary men dıplomatııalyq ókildikteriniń qoldaýymen Taıaý Shyǵys óńirinen Qazaqstanǵa 9517 qazaqstandyq qaıtaryldy.