Qazaqstan dıplomatııadaǵy medıator róline qaıta oralatyn sııaqty – saıasattanýshy

Prezıdent Qasym-Jomart Toqaevtyń Germanııaǵa sapary kezinde  aımaqtaǵy geosaıası ahýal týraly bildirgen pikiri Qazaqstan dıplomatııasy ara aǵaıyndyq ustanymynan aınymaıtynyn kórsetken. QR Prezıdenti janyndaǵy Qazaqstannyń strategııalyq zertteýler ınstıtýty qaýipsizdik bóliminiń basshysy Dáýren Áben osyndaı paıym aıtyp otyr, dep habarlaıdy QazAqparat tilshisi. 

«Qazaqstan dıplomatııadaǵy ara aǵaıyn\medıator róline qaıta oralatyn sııaqty. Germanııadaǵy saparynda Prezıdent Qasym-Jomart Toqaev Qazaqstan Reseı-Ýkraına shıelenisin sheshýdiń qandaı da bir jolyn usynyp jatqan elderdiń nemese memleketter tobynyń talpynysyn qoldaıtynyn aıtty. Óz kezeginde Qazaqstan áskerı is-qımyldardyń tez arada toqtatylýyn jáne BUU Jarǵysy negizinde beıbit kelissóz júrgizilýin jaqtaıdy», - deıdi sarapshy.

Saıasattanýshy kez kelgen halyqaralyq shıelenistiń núktesi dıplomatııalyq kelissózde qoıylatynyn eske saldy.

«Qasym-Jomart Toqaevtyń sózinshe, Máskeý de, Kıev te kelissózderge daıyn ekenin rastaıdy. Alaıda kelissózdiń qandaı alańda júrgiziletini ázirge belgisiz. Kelissózge negiz tabý úshin taraptarǵa «bir-birin aıyptaýdy doǵaryp, iske tatymdy kelissóz júrgizý kerek». Qasym-Jomart Toqaevtyń paıymynsha, «parasatty, salmaqty, salıqaly dıplomatııanyń kezeńi týyp keledi», - deıdi Dáýren Áben.

Eske salsaq, Memleket basshysy Germanııa Federaldyq kantsleri Olaf Sholtspen kelissózderden keıin tilshilermen ótken baspasóz máslıhatynda Ýkraınadaǵy jaǵdaıǵa qatysty Qazaqstannyń ustanymyn aıtty.