Qazaqstan desantshylary 26 jyldyq belesti baǵyndyrdy
ASTANA. KAZINFORM — 6 shilde — Desanttyq-shabýyldaý áskerleriniń qurylǵan kúni. Bıyl desantshylar 26 jyldyq belesterin atap ótip jatyr, dep habarlaıdy Qorǵanys mınıstrliginiń baspasóz qyzmeti.
Osy jyldar ishinde Desanttyq-shabýyldaý áskerleri qalyptasý men damý jolynan ótip, Qazaqstan Qarýly kúshteriniń eń utqyr ári jaýyngerlik ázirligi joǵary ásker tekteriniń birine aınaldy. Joǵarǵy Bas qolbasshynyń rezervi sanalatyn desantshylar elimizdiń egemendigi men aýmaqtyq tutastyǵyn qorǵaý jónindegi mindetterdi qysqa merzimde oryndaýǵa, qazirgi zamanǵy syn-tegeýrinder men qaýip-qaterlerde jedel áreket etýge qabiletti.
Búginde Desanttyq-shabýyldaý áskerleriniń jeke quramy zamanaýı talaptarǵa saı jaýyngerlik daıarlyqty úzdiksiz jetildirý ústinde. Quramalarda ushqyshsyz basqarylatyn avıatsııalyq júıeler belsendi engizilip, barlaý múmkindikteri keńeıtilýde, áýe-desanttyq daıarlyǵy jetildirilip keledi. Jeke quramdy desanttaý, jaýyngerlik atystar ótkizý jáne qarý-jaraq pen áskerı tehnıkanyń zamanaýı úlgilerin qoldaný arqyly keshendi taktıkalyq oqý-jattyǵýlar turaqty túrde ótkizilip keledi.
Desantshylar joǵary jaýyngerlik ázirlikti jyl saıyn halyqaralyq jáne respýblıkalyq oqý-jattyǵýlar barysynda, sondaı-aq BUU aıasyndaǵy bitimgerlik mindetterdi oryndaý kezinde dáleldep júr.
— Bıyl Desanttyq-shabýyldaý áskerleriniń bólimsheleri birqatar iri halyqaralyq jáne respýblıkalyq jaýyngerlik daıarlyq is-sharalaryna qatysady. Qazaqstan aýmaǵynda Desanttyq-shabýyldaý áskerleriniń qolbasshysy basshylyq etetin UQShU Ortalyq Azııa óńiriniń Ujymdyq jedel áreket etý kúshterimen birlesken «Shekara-2026» oqý-jattyǵýy jáne «Baýyrlastyq shyńy — 2026» halyqaralyq oqý-jattyǵýy ótedi. Budan bólek, desantshylar «Batyl toıtarys — 2026» respýblıkalyq oqý-jattyǵýyna, jaýyngerlik mashyqty arttyrý men seriktes memleketterdiń qarýly kúshterimen jedel ózara is-áreketti damytýǵa baǵyttalǵan «Ózara is-qımyl — 2026», «Myzǵymas baýyrlastyq — 2026» jáne «Orman baýyrlastyǵy — 2026» halyqaralyq oqý-jattyǵýlaryna qatysady, — delingen mınıstrlik habarlamasynda.
Qazirgi tańda Desanttyq-shabýyldaý áskerleriniń sapynda joǵary kásibılikti, áskerı boryshqa adaldyqty jáne eń kúrdeli mindetterdi oryndaýǵa árdaıym daıyn bolýdy boryshynyń basty qaǵıdatyna aınaldyrǵan áskerı qyzmetshiler qyzmet atqaryp júr. Desantshylar aǵa býynnyń dańqty jaýyngerlik dástúrlerin qasterleı otyryp, ózderiniń «Bizden basqa eshkim emes!» degen jaýyngerlik uranyna árqashan adal bolyp, jas áskerı qyzmetshilerdi patrıotızm, erlik pen Otanǵa adaldyq rýhynda tárbıeleýdi jalǵastyryp keledi.
Osyǵan deıin Taldyqorǵanda 400-den astam desantshy alǵash ret parashıýtpen sekirgenin jazdyq.
