Qazaqstan densaýlyq saqtaý júıesindegi álemdik básekelestik rankınginde 17 orynǵa alǵa jyljydy
ALMATY. QazAqparat - Qazaqstan bala ólimi kórsetkishiniń azaıýyna baılanysty álemdik ekonomıkalyq básekelestik rankınginde 17 orynǵa alǵa jyljydy. Bul týraly Dúnıejúzilik Densaýlyq saqtaý uıymynyń Qazaqstandaǵy ókili Melıta Výınovıch Almatydaǵy perınatalogııa men balalar kardıohırýrgııasy ortalyǵyna sapary barysynda málim etti.
Onyń aıtýynsha, bul kórsetkishke jetý tek densaýlyq saqtaý salasyndaǵy jetistikterge baılanysty bolyp otyr.
«Qazaqstan bala ólimi kórsetkishiniń azaıýyna baılanysty 17 orynǵa alǵa jyljydy. Bul aqparatty Davos Ekonomıkalyq forýmynan estidińizder. 2012 jylǵy nátıje boıynsha Qazaqstanda myń adamǵa shaqqanda bala ólimi kórsetkishi 16,7-ni qurady. 2013 jylǵy kórsetkish odan da jaqsy ekendigine senimim mol», - dedi Melıta Výınovıch.
Mamannyń aıtýynsha, sońǵy úsh jylda Qazaqstan medıtsınasynda júzege asqan jumystar kóp máseleniń sheshimi tabýǵa septigin tıgizdi. Ótken jyly DSU Qazaqstandaǵy bala ólimin zertteý maqsatynda arnaıy halyqaralyq top qurylǵan bolatyn.
«Astanada qurylǵan top qazaqstandyqtardyń ómir súrýi, nekelesýi boıynsha medıtsınalyq statıstıka jasady. Biz sondaı-aq, Ulttyq statıstıka agenttiginen de málimet aldyq. Jumys tobynyń qorytyndysy boıynsha Qazaqstanda bala ólimi kórsetkishi tómendegen degen pikirge keldik»,- dedi ol.
Melıta Výınovıch Qazaqstannyń barlyq óńirlerinde áıelderdi bosandyrý DDSU talaptary men tehnologııalaryna saı júzege asatynyn atap ótti.
«Bizge Nıý-Iorktan, Jenevadan, Garvardtan sarapshylar keldi. Olarǵa osyndaǵy salmaǵy 1 kelige tolmaıtyn shaqalaqtar adam qataryna qosylyp ketedi desek, eshkim senbeıdi. Shyn máninde, Qazaqstannyń kórsetkishi Shvetsııadaǵy kórsetkishpen barabar»,- dedi M.Výınovıch.
