Almatyda Nurǵısa Tilendıevti eske alý keshi ótti
ALMATY. KAZINFORM — Jambyl atyndaǵy Qazaq memlekettik akademııalyq fılarmonııasynda qazaqtyń kórnekti kompozıtory, kúıshi, KSRO halyq ártisi, Halyq qaharmany Nurǵısa Tilendıevtiń týǵan kúnine oraı «Atadan mura» atty eske alý keshi ótti.
Kontserttik baǵdarlama aıasynda Nurǵısa Tilendıev atyndaǵy «Otyrar sazy» akademııalyq folklorlyq-etnografııalyq orkestri óner kórsetti. Ujymnyń kórkemdik jetekshisi ári bas dırıjeri – Dinzýhra Tilendıeva. Sonymen qatar kontsertke tanymal dırıjerler Jalǵasbek Begendikov pen Abylqaıyrhan Beısekov qatysty.
Kesh barysynda kompozıtordyń shyǵarmashylyq murasynyń ajyramas bóligine aınalǵan «Ata tolǵaýy», «Álqıssa», «Mahambet» kúıleri oryndaldy. Sondaı-aq, belgili ánshiler Ramazan Stamǵazy, Svetlana Aıtbaeva jáne Farhat Kýbıevtiń oryndaýynda «Qustar áni», «Saryjaılaý», «Kýá bol» ánderi shyrqaldy.
Keshtiń áserli sátteriniń biri – kompozıtordyń nemeresi Daıana Tilendıevanyń Nurǵısa Tilendıevtiń jary Darıǵaǵa arnaǵan «Kýá bol» ánin oryndaýy boldy. Sonymen qatar, opera ánshileri Áıgerim Sháripbek pen Juldyz Baıjumanyń óner kórsetýi sharanyń kórkemdik deńgeıin odan ári bıiktete tústi.
Aıta keteıik, Halyq qaharmany, kórnekti mádenıet jáne óner qaıratkeri, birtýar kompozıtor Nurǵısa Tilendıevtiń týǵanyna 100 jyl tolýyna oraı týǵan jeri — Almaty oblysy Ótegen batyr aýylynda uly tulǵanyń eskertkishi boı kóterip, jańa mádenıet úıi ashyldy.
