Qazaqstan delegatsııasy Gonkongte ótken II Jastardy damytý sammıtine qatysty

ASTANA. KAZINFORM — Gonkongte «Connecting the world into the Future» («Álemdi bolashaqqa jalǵaý») taqyrybynda II Halyqaralyq Jastardy damytý sammıti ótti.

Halyqaralyq kezdesýdiń maqsaty — jastar saıasaty, tehnologııalyq ınnovatsııalar, mádenıet jáne kreatıvti ındýstrııa salasynda tájirıbe almasý.

Sammıtke Qazaqstan, Sıngapýr, Japonııa, Malaızııa, Taıland, Fılıppın, Indonezııa jáne basqa da sheteldik memleketterden kelgen delegattar qatysty. Іs-sharaǵa 2 myńnan astam adam jınaldy.

Spıker retinde jastar saıasatyna jaýapty memlekettik qyzmetkerler, sondaı-aq bıznes kóshbasshylary men jastar uıymdarynyń ókilderi sóz sóıledi. Qazaqstan atynan QR Mádenıet jáne aqparat vıtse-mınıstri Evgenıı Kochetov qatysty. Ol óz sózinde Qazaqstan-Qytaı qatynastarynyń qarqyndy damyp kele jatqanyn atap ótip, eki el basshylarynyń ózara sapary yntymaqtastyqty nyǵaıtýǵa zor serpin bergenin aıtty.

— Qazaqstan Prezıdenti Qasym-Jomart Toqaev jastar saıasatyna erekshe kóńil bóledi, óıtkeni eldiń bolashaǵy — jastardyń qolynda. Memleket basshysynyń janynda Jastar saıasaty jónindegi keńes jemisti jumys istep keledi. Sonymen qatar, jastardyń Prezıdenttik kadr rezervi de bar. Bul bastamalar jastardyń kóshbasshylyq qabiletterin kórsetýge, eldiń damýyna úles qosýyna jáne memlekettik ári qoǵamdyq basqarýda óz ornyn tabýǵa baǵyttalǵan, — dedi Evgenıı Kochetov.

Sondaı-aq, Gonkongke sapar aıasynda qazaqstandyq delegatsııa Gonkongtiń Іshki ister jáne jastar máseleleri jónindegi hatshysymen ekijaqty kezdesý ótkizdi.

Budan bólek, Hong Kong Arts Development Council basshylyǵymen kelissózder júrgizilip, kreatıvti ındýstrııa salasyndaǵy áriptestikti damytý máseleleri talqylandy.

Aıta keteıik, Qaraǵandyda Halyqaralyq jumysshy jastar forýmy ótti.