Qazaqstan delegatsııasy WADA atqarý komıtetiniń otyrysyna qatysýda

NUR-SULTAN. QazAqparat - Polshanyń Kotovıtse qalasynda Dúnıejúzilik dopıngke qarsy agenttiktiń atqarý komıtetiniń otyrysy ótip jatyr, dep habarlaıdy QazAqparat tilshisi.

Konferentsııaǵa sporttyń barlyq túrinen 2 myńǵa jýyq delegat shaqyrylǵan. Bul basqosýǵa Qazaqstan Respýblıkasynyń Mádenıet jáne sport vıtse-mınıstri Eldos Ramazanov, Sport jáne dene shynyqtyrý isteri komıteti tóraǵasynyń orynbasary Asqar Esimov, QR Dopıngke qarsy ulttyq ortalyǵynyń dırektory Maıra Baqasheva qatysýda.

QR Mádenıet jáne sport mınıstrliginiń málimetinshe, konferentsııa aıasynda qazaqstandyq delegatsııa DDQA bas dırektory Olıve Nıgglemen, Azııa keńsesiniń dırektory Kazýhıro Haıashımen ekijaqty kezdesýler ótkizedi.

Otyrystyń kún tártibinde DDQA prezıdentin, vıtse-prezıdentin jańa merzimge saılaý, áleýmettik zertteýler, densaýlyq, medıtsına, dopıngke qarsy uıymnyń halyqaralyq standarttaryna sholý jáne ózge de ózekti máseleler qarastyrylady.

Aıta keteıik, DDQA bıyl óziniń 20 jyldyǵyn atap ótedi. Al Qazaqstan Respýblıkasy Dopıngke qarsy ulttyq ortalyǵy QR Úkimetiniń 2012 jylǵy 29 jeltoqsandaǵy № 1718 qaýlysyna sáıkes qurylǵan memlekettik uıym sanalady.

QazDQUO qyzmeti halyqaralyq dopıngke qarsy zańnamalyq aktilerge sáıkes. Ortalyqtyń negizinde Orta Azııa Óńirlik dopıngke qarsy úıymy (RADOCA) jumys isteıdi. Ol Ortalyq Azııa boıynsha: Qazaqstan Respýblıkasy, Ózbekstan Respýblıkasy, Qyrǵyz Respýblıkasy, Tájikstan Respýblıkasy, Túrikmenstan, Aýǵanstan Islam Respýblıkasy, Pákistan Islam Respýblıkasy jáne Mońǵolııada is-sharalarǵa baǵyt-baǵdar berý jolynda qyzmet atqarady.

QazDQUO negizgi mıssııasy - sportshylarǵa aqparat berý jáne olardy ádil jáne adal oıyn qaǵıdattaryn jáne sportty dopıngten saqtaý úshin qajetti bilim men daǵdylarmen qamtamasyz etý.