Qazaqstan delegatsııasy TMD Syrtqy ister mınıstrleri keńesiniń otyrysyna qatysty

MÁSKEÝ. QazAqparat – Premer-Mınıstrdiń orynbasary – Syrtqy ister mınıstri Muhtar Tileýberdi bastaǵan Qazaqstan delegatsııasy Reseı astanasynda ótken Táýelsiz Memleketter Dostastyǵy Syrtqy ister mınıstrleri keńesiniń kezekti otyrysyna qatysty. Bul týraly QazAqparat SІM silteme jasap habarlaıdy.

TMD elderiniń syrtqy saıası vedomstvolarynyń basshylary halyqaralyq kún tártibindegi ózekti máselelerdi, onyń ishinde óńirlik qaýipsizdik problematıkasyn, ekonomıkalyq jáne mádenı-gýmanıtarlyq salalardaǵy yntymaqtastyqtyń jaı-kúıi men perspektıvalaryn talqylady. 2020 jyly Dostastyq memleketteri Syrtqy ister mınıstrlikteriniń beıindi departamentteriniń ózara is-qımyly týraly aqparat tyńdaldy.

Otyrysqa qatysýshylar qaýipsizdik pen quqyqtyq tártipti qamtamasyz etý salasyndaǵy kópjaqty yntymaqtastyqty keńeıtýdi kózdeıtin qujattardy maquldady.

TMD Úkimet basshylary keńesiniń sheshimin oryndaý úshin syrtqy ister mınıstrleri dene shynyqtyrý jáne sport salasyndaǵy, sondaı-aq týrızm jáne jastar baılanystary salasyndaǵy kópjosparly yntymaqtastyqty damytý jónindegi qysqa merzimdi is-sharalar josparyn bekitti. Taraptar 1941-1945 jyldardaǵy Ekinshi dúnıejúzilik soǵystyń bastalýynyń 80 jyldyǵyna baılanysty TMD memleketteri basshylarynyń Dostastyqqa qatysýshy memleketter halyqtaryna jáne álemdik qoǵamdastyqqa úndeýiniń jobasyn kelisti.

TMD SІMK otyrysy aıasynda M.Tileýberdi Túrikmenstan Mınıstrler Kabıneti Tóraǵasynyń orynbasary – Syrtqy ister mınıstri Rashıd Meredovpen ekijaqty kelissózder júrgizdi. Taraptar qazaqstan-túrikmen qatynastarynyń joǵary qarqynyn atap ótti, sondaı-aq eki memleket basshylarynyń qatysýymen ótetin aldaǵy joǵary deńgeıdegi kezdesýlerge daıyndyq máselelerin talqylady.