Qazaqstan delegatsııasy BUU Bas assambleıasynyń 77-sessııasyna qatysýǵa daıyndalýda

ASTANA. QazAqparat – BUU Bas assambleıasynyń 77-sessııasyna qatysýshylar sońǵy birneshe aıdyń ishinde álemdik saıasatta pisip-jetilgen eń ózekti máselelerdi talqyǵa salady. Sessııa jumysyna Qazaqstan Prezıdenti Qasym-Jomart Toqaev qatysady. Bul týraly QR Prezıdenti Teleradıokesheniniń «Úsh saýal» jobasynyń qonaǵy QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov aıtty, dep habarlaıdy QazAqparat tilshisi.

Spıkerdiń atap ótýinshe, Bas assambleıa alańynda beıbitshilik pen soǵystarǵa, basqasha aıtar bolsaq, halyqaralyq qaýipsizdiktiń barlyq normalarynyń saqtalýyna jaýapty jalǵyz halyqaralyq jahandyq uıym retinde BUU qyzmetin jaqsartý jaıy da talqyǵa túsetin bolady.

«Ádettegideı qyrkúıek aıynyń sońynda barlyq eldiń kóshbasshylary Nıý-Iorkke, BUU shtab páterine búkil ǵalamshar úshin mańyzdy beıbitshilik pen soǵys, halyqaralyq qatynastar, jahandyq jylyný máselelerin talqylaý úshin jınalady», - dedi Erkin Tuqymov.

Foto: businessinsider.in