«Qazaqstan daýysy» tanymal vokaldyq jobasyna qatysý tegin bolmaq
ASTANA. QazAqparat - «Qazaqstan» ulttyq telearnasyndaǵy «Qazaqstan daýysy» atty tanymal mýzykalyq jobasyna qatysý tegin. Ol týraly jobanyń uıymdastyrýshylary habarlady.
Ekinshi maýsymǵa irikteý 27 shilde, jeksenbi kúni Astana qalasynda, Almaty qalasynda - 6 tamyzda ótedi, dep habarlady «Qazaqstan» RTRK» AQ baspasóz qyzmeti.
Astana qalasyndaǵy irikteý kezeńi Abaı k. 47, «Ramada plaza» qonaqúıiniń ǵımaratynda, Almaty qalasynda Tóle bı kóshesi 296 A mekenjaıy boıynsha ótkiziledi.
Jobanyń televızııalyq nusqasy «Qazaqstan» ulttyq telearnasynda 26 qazannan bastap kórsetiledi. Joba sms daýys berý múmkindigimen 2015 jyldyń 11 qańtarynan bastap, tikeleı efırde ótkiziledi.
Jobaǵa 18 ben 50 jas aralyǵyndaǵy oryndaýshylar qatysa alady. Tilek bildirýshiler ózimen tek qana jeke basyn rastaıtyn qujatyn alyp kelse boldy. Jobaǵa qatysý úshin aqsha tóleýdiń esh qajeti joq - aqysyz.
Atalǵan jobanyń ózge baıqaýlardan ereksheligi, bul baıqaý qatysýshylardyń tek daýysqa súıenip, baq synaıtyndyǵy. Elimizdiń Medeý Arynbaev, Nurlan Alban, Mádına Sádýaqasova, Almas Kishkenbaev syndy tanymal juldyzdary alǵashqy tyńdaý synaǵynda júzden astam qatysýshylardyń ishinen úzdikterin tańdap, tórt komanda quraıtyn bolady. Aqtyq márege tórt úmitker qatysady, olardyń ishinen úzdik oryndaýshy SMS-daýys berý arqyly anyqtalady.
Fınalǵa deıingi árbir kezeńde úmitkerler kásibı komanda tálimgerinen sabaq alady. Talanty men tálimgerden alǵan biliminiń arqasynda alǵa ozǵan úmitker jeńimpaz atanary sózsiz.
Bul joba The Voice of Holland (Nıderlandy) nemese «Golos» túpnusqalyq formatynyń qazaqstandyq nusqasy, ol 2013 jyldyń jazynda bastaldy. «Qazaqstan Daýysy» jobasynyń alǵashqy maýsymynyń jeńimpazy - Qostanaı oblysynyń týmasy 27 jastaǵy Shaharızat Seıdahmet. Oryndaýshynyń tálimgeri - Nurlan Alban. Baıqaý jeńimpazy álemge áıgili «Universal» dybys jazý stýdııasymen bir jylǵa kelisimshartqa otyrý múmkindigine qol jetkizip, 5 mıllıon teńge qarjylaı syıaqyǵa ıe boldy.
«Qazaqstan daýysy» 3 kezeńnen turady. Birinshi kezeń - barlyq qatysýshylardy tyńdaý arqyly ádilqazylardyń árqaısysy tórt top qurady. Ekinshi kezeńde ár túrli toptardyń múshelerinen quralǵan juptyq saıys ótkiziledi. Úshinshi kezeńde jeńimpazdardy halyq SMS-daýys berý arqyly anyqtaıtyn bolady.
Telejobaǵa qatysyp, baǵymdy synaımyn degen úmitkerler Almaty qalasyndaǵy +7 727 250-65-61 telefony nemese www.thevoice.kz saıty arqyly tolyq aqparat alýyna bolady.
