«Qazaqstan daýysy» megajobasynyń bas júldesi úshin kúres bastalyp ketti
ASTANA. QazAqparat - «Qazaqstan» ulttyq telearnasyndaǵy «Qazaqstan daýysy» atty tanymal mýzykalyq jobasy elimizdiń talantty ul-qyzdaryn megajobanyń úshinshi maýsymynda baq synaýǵa shaqyrady! Іrikteý sharalary elimizdiń batysy men shyǵysynda, soltústigi men ońtústiginde ótedi. 19 mamyrda - Aqtaý, 21 mamyrda - Semeı qalalarynda irikteý kezeńderi ótti. Bul týraly «Qazaqstan» RTRK Baspasóz qyzmeti habarlady.
Al búgin, 23 mamyrda Astana qalasyndaǵy irikteý kezeń «Ramada plaza» qonaqúıiniń ǵımaratynda, Almaty qalasynda 28-29 mamyrda Ál-Farabı dańǵyly, 176 meken-jaıynda ornalasqan «Qazaqfılm» kınostýdııasy ǵımaratynda ótkiziledi. Bas júlde - 5 mln. teńge. Jobaǵa 18 ben 50 jas aralyǵyndaǵy oryndaýshylar qatysa alady.
Atalǵan jobanyń ózge baıqaýlardan ereksheligi, bul baıqaý qatysýshylardyń tek daýysqa súıenip, baq synaıtyndyǵy. Elimizdiń tanymal juldyzdary alǵashqy tyńdaý synaǵynda júzden astam qatysýshylardyń ishinen úzdikterin tańdap, tórt komanda quraıtyn bolady. Aqtyq márege tórt úmitker qatysady, olardyń ishinen úzdik oryndaýshy SMS-daýys berý arqyly anyqtalady.
Fınalǵa deıingi ár bir kezeńde úmitkerler kásibı komanda tálimgerinen sabaq alady. Talanty men tálimgerden alǵan biliminiń arqasynda alǵa ozǵan úmitker jeńimpaz atanary sózsiz.
Bul joba The Voice of Holland (Nıderlandy) nemese «Golos» túpnusqalyq formatynyń qazaqstandyq nusqasy, 2013 jyldyń jazynda bastaldy. «Qazaqstan Daýysy» jobasynyń alǵashqy maýsymynyń jeńimpazy - Qostanaı oblysynyń týmasy 27 jastaǵy Shaharızat Seıdahmet. Oryndaýshynyń tálimgeri - Nurlan Alban. Kórermenderdiń tańdaýy boıynsha, «Qazaqstan daýysy» tanymal mýzykalyq jobanyń ekinshi maýsymynyń jeńimpazy ataǵyna jáne 5 mln teńgege Almas Kishkenbaevtyń tobyndaǵy Baýyrjan Retbaev ıe boldy.
«Qazaqstan Daýysy» 3 kezeńnen turady. Birinshi kezeń - barlyq qatysýshylardy tyńdaý arqyly ádilqazylardyń árqaısysy tórt top qurady. Ekinshi kezeńde ár túrli toptardyń múshelerinen quralǵan juptyq saıys ótkiziledi. Úshinshi kezeńde jeńimpazdardy halyq SMS-daýys berý arqyly anyqtaıtyn bolady.
Telejobaǵa qatysyp, baǵymdy synaımyn degen úmitkerler Almaty qalasyndaǵy +7 727 250-65-61 telefony nemese www.thevoice.kz saıty arqyly tolyq aqparat alýyna bolady.
