QAZAQSTAN DAÝYSY: Anam meniń aýdarmashy bolǵanymda qalady alaıda, men ándi tańdadym - I.Edilbaeva
ASTANA. QazAqparat - Anam meniń aýdarmashy bolǵanymda qalady. Sol sebepti de ómirimdi aǵylshyn tilimen baılanystyrdy. Alaıda, men ándi tańdadym, deıdi «Qazaqstan daýysy» jobasynyń fınalyna jetken úzdik tórttiktiń biri Indıra Edilbaeva.
Indıra Edilbaeva - Mádına Sádýaqasova tobyndaǵy úzdiktiń biri. Ol jobaǵa deıin vokaldy-ınstrýmentaldy ansamblde jumys istegen.
Ol Atyraýda dúnıege kelgen. Jeti jasqa deıin Aqtaý qalasynda, keıin Aqtóbede turǵan. A.Jubanov atyndaǵy Aqtóbe memlekettik ýnıversıtetin aǵylshyn jáne nemis tili mamandyǵy boıynsha támamdaǵan. Ómirlik ustanymy: «Qandaı jaǵdaı bolsyn, ózińe sen».
Indıra - otbasyndaǵy jalǵyz bala. 13 jasqa qaraǵanda ákesi qaıtys bolǵan. Sol sebepti onyń oıynsha, anasy - ákeniń, aǵanyń, ápkeniń ornyn basqan eń jaqyn jan, ári dos.
«Anam - mektepte aǵylshyn tilinen sabaq beredi. Meniń aǵylshyn tili men shetel ánderine degen qyzyǵýshylyǵymdy ashqan da anam. Bes jasta bolǵan kezimde anam Mariah Carey-diń ánderin magnıtafonda oınatatyn. Biz sol ánshiniń ánderin tyńdaı júrip, qosyla aıtatynbyz, úı jınaıtynbyz»,-deıdi ánshi.
«Barlyq janrdaǵy ánderdi tyńdaı beremin. Onyń arasynda qazaqtyń halyq ánderi de, tipti rok janryndaǵy ánder de bar».
Eger ánshi bolmasań, kim bolar ediń degen saýalǵa Indıra: «Sheteldik kompanııalardyń birinde mamandyǵym boıynsha, aǵylshyn tilinen aýdarmashy bolyp qyzmet eter edim. Anam meniń aýdarmashy bolǵanymda qalady. Sol sebepti de ómirimdi aǵylshyn tilimen baılanystyrdy. Alaıda, men ándi tańdadym»,-deıdi.
«Qazaqstan daýysynyń» fınalyna jetken tórt úmitkerdiń qaısysy úzdik shyǵatyny aldaǵy aptada belgili bolady. Naqtyraq aıtqanda, kimniń baǵy janatynyn 15 aqpan saǵat 21.00-de «Qazaqstan» Ulttyq telearnasynan «Qazaqstan daýysy» jobasynan kórýge bolady.
