«Qazaqstan daýysy» án jobasynyń tálimgerleri jańa maýsym jaıly oılarymen bólisti

Shoýdyń taǵy bir ereksheligi - tálimgerler úmitkerlerge syn aıtyp, eskertý jasamaıdy. Óz qamqorlyǵyna alǵan toptaǵy ánshilermen jeńiske jetý jolynda tyǵyz baılanys ornatyp, jumys isteıdi. Kásibı sheberligin shyńdaýǵa kómektesedi. Tálimgerler bul kezeńde óz tobynda ishteı irikteý ótkizedi. Eki ánshi bir ándi qatar aıtyp ózara saıysqa túsedi. Joly bolǵan úmitker kelesi kezeńge ótedi. Jartylaı fınalda qatysýshylar tikeleı efırde óner kórsetedi. Bul kezeńde úmitkerlerdiń keıbirin kórermen SMS daýys berý arqyly jobada qaldyra alady. Birqatary tálimgerdiń qalaýy boıynsha kelesi kezeńge ótedi. Qalǵan ónerpazdar ózara saıysqa túsedi. Aqtyq synda ár toptan bir bir úmitkerden iriktelip, bas júlde úshin baq synaıdy. Olardyń bireýi ǵana «Qazaqstan daýysy» ıesi atanady.

Jańa maýsym qarsańynda biz estrada ánshilerine «Qazaqstan daýysy» jobasyna tálimger retinde qandaı baǵa beresiz?» jáne «Jobanyń jańa maýsymynan ne kútesiz?» degen eki suraq joldaǵan edik.

«Bul jobany mýzykany jan-tánimen súıetin, mýzykalyq saýaty bar, osy baǵytta jumys isteı alatyn, tájirıbesi mol mamandar jasap jatyr. Sondyqtan «Qazaqstan daýysy» telejobasynyń deńgeıi joǵary. Dál osyndaı baǵdarlama qazaq televızııa tarıhynda buryn-sońdy bolmaǵan», - deıdi Nurlan Alban.

Eknishi saýalǵa ol: «Ózderińiz bilesizder, byltyr meniń tobymda óner kórsetken Shaharızat Seıdahmet jeńiske jetip, úmitimdi aqtady. Bıyl da osy mejeden kóriný úshin burynǵydan da kóbirek eńbek etýime týra keledi. Jańa maýsymda da jas daryndardan top jasaqtap, taǵy bir talanttyń baǵyn ashqym keledi», - dep jaýap berdi.

Al Almas Kishkenbaev: «Shetelde jasalǵan «Daýys» atty telejobany ǵalamtordan kórgenimde osyndaı baǵdarlama Qazaqstanda da daıyndalsa eken dep armandap edim. «Qazaqstan daýysy» bizde túsiriletinin estigenimde, ári oǵan tálimger retinde meni shaqyrǵanda qatty qýandym. Mundaı sapaly, mýzykalyq úlken baǵdarlamaǵa qatysýdyń ózi árbir ánshi úshin mártebe», deı kele: «Birinshi maýsym aıaqtalǵannan keıin arada jarty jyldan astam ýaqyt ótti. Meniń tobymdaǵy ánshiler birinshi orynnyń tuǵyrynan kórinbegenimen, durys tańdaý jasaǵanyma kózim jetti. Jańa maýsymda naǵyz daryn ıesin tańdaımyn nemese olar meni tańdaıdy dep úmittenemin. Elimizde jas talanttar kóp. Solardyń bıikke kóterilip, sahnadan óz ornyn tabýyna septigim tıip jatsa, oıymnyń oryndalǵany dep bilemin»,- dep túıindedi oıyn.

Sondaı-aq Madına Sádýaqasova «Baǵdarlamanyń bizdiń elimizde ánshige de, kórermenge de qyzyq bolǵanyn ári osyndaı jobanyń kerek ekenin birinshi maýsymda baıkadyq. Joba naǵyz talantardy tanytýǵa múmkindik beredi. Sondaı daryn ıelerin tańdap alyp, olarmen birge jumys isteý, daýystaryna laıyqty ánderdi suryptaı bilý úlken jaýapkershilik júkteıdi. Jobaǵa eń joǵary, «bes» degen baǵa beremin. Jańa maýysymda meniń tobymdaǵy ánshilerdiń biri «Qazaqstan daýysy» atansa eken dep tileımin», - dedi.

«Kóptiń kóńilinen shyqqan jobanyń jalǵasyn tapqanyna qýanyshtymyn. Osyndaı halyqaralyq joba bizge kerek. Al uıymdastyrylý deńgeıine keletin bolsaq, ózge elde ótip jatqan «Daýys» baǵdarlamalarynan esh kem emes. Óıtkeni, jobaǵa shaqyrylǵan dybys rejısseri, jaryq berýshiler, operatorlar, prodıýserler, qoıýshy rejısser, barlyǵy da kásibı mamandar, qoryta aıtqanda, myqty komanda jasaqtalǵan. Ádemi, ashyq daýys bir ǵana adamnyń menshigi emes, ol halyqtyń baılyǵy. Keń tynysty, jaǵymdy qazaqy ún tyńdarmannyń qulaǵyna jetýi tıis. Sondyqtan qazaqtyń talantty ul-qyzdaryn «Qazaqstan daýysyna» qatysýǵa shaqyramyn», - dedi ánshi Medeý Arynbaev.