QAZAQSTAN DAÝYSY: 5 mıllıon teńge kimge buıyrady?
ASTANA. QazAqparat - «Qazaqstan» ulttyq arnasynan jarty jyldan astam ýaqyttan beri kórsetilip kele jatqan «Qazaqstan daýysy» telejobasy aldaǵy jeksenbide, aqpannyń 15-de aıaqtalady. Jobanyń aqtyq synynda tálimgerleriniń qoldaýyna ıe bolyp, kórermenderdiń eń kóp daýysyn jınaǵan 4 úmitker baq synaıdy. Olar: Baýyrjan Retbaev, Danııar Ismaılov, Indıra Edilbaeva jáne Maqsat Maqulbekov.
Elimizge tanymal 4 tálimger Nurlan Alban, Madına Sádýaqasova, Medeý Arynbaev jáne Almas Kishkenbaev shákirtterin aldaǵy sheshýshi óner saıysyna qyzý daıyndap jatyr.
Kim jeńimpaz atanady? Jobanyń bas júldesi - 5 mln. teńge kimge buıyrady? Muny tek kórermenniń daýysy sheshedi.
Bul televızııalyq shoý alǵash ret 2010 jyly Nıderlandynyń RTL4 telearnasynda «The Voice of Holland» degen atpen jaryqqa shyqqan. Sodan keıingi 4 jylda bul joba álemniń 50 shaqty eline tarap úlgerdi.
Esterińizge sala keteıik, Almas Kishkenbaevtyń úmitkeri Baýyrjan Retbaevtyń rettik nómiri - 28, Nurlan Alban baptaǵan Danııar Ismaılovtyń rettik nómiri - 22, Medeý Arynbaevtyń shákirti Maqsat Maqulbekovtiń rettik nómiri - 32, Madına Sádýaqasovanyń úkili úmiti - Indıra Edilbaevanyń rettik nómiri - 17.
Osy qatysýshylardyń ishinen ózińiz qalaǵan úmitkerdiń rettik nómirin 3075 nómirine joldaý arqyly nemese 8 80 90 80 30 75 nómirine telefon soǵyp, daýys bere alasyz.
