«Qazaqstan daýysy - 2015»: Muratbek Haırolda jeńiske jetti!
ASTANA. QazAqparat - Búgin jarty jylǵa sozylǵan elimizdegi aıtýly án dodasy - «Qazaqstan daýysynyń» úshinshi maýsymy óz máresine jetip, Muratbek Haırolda jeńimpaz atandy.
Birneshe aptadan beri «Qazaqstan» Ulttyq telearnasynyń tikeleı efırinde kórermenniń daýys berýimen úzdikter irikteldi. Sońǵy kezeńde 16 ánshiniń ishinen kópshiliktiń kóńilinen shyqqan jáne kóp daýys jınaǵan 4 ónerpaz ǵana qalǵan bolatyn. Olar: Rústem Nurjigittiń tobynan dara shyqqan qytaıdan kelgen qandasymyz Jánnat Ádilhanqyzy. Mádına Sádýaqasovanyń shákirti - Erbol Tájibaev. Nurlan Albannyń shákirti Muratbek Haırolda. Al Almas Kishkenbaevtyń shákirti Dıana Ismaılova.
Ótken saıysta kórermenniń 80 paıyz daýysyn jınaǵan úmitker Muratbek Haırolda búgin belgili ánshi Ǵadilbek Janaımen «Hanshaıymym» (R.Zaıytov/Ǵ.Janaı) ánin oryndady. Kórermenniń rııasyz qoshemetine bólenip júrgen úmitker Dıana Ismaılova Dılnaz Ahmadıevamen birge «Kóz aldymda» (S.Baqytjan/S.Baqytjan) ánin shyrqady. Úzdik atanýdan úmittilerdiń biri - Jánnat Ádilhanqyzy Erke Esmahanmen «Asyl arman» (R.Zaıytov, A.Dúısenov) ánin oryndady. Erbol Tájibaev ánshi Aıqynmen birge án aıtty. Alǵashqy kezeń qorytyndysy boıynsha Dıana Ismaılova jarysty toqtatty. Ekinshi aınalymda qatysýshylar tálimgerlerimen birge án aıtýy kerek bolatyn. Bul joly tálimgeri Mádına Sádýaqasovamen «Jaılaýkól keshteri» ánin oryndaǵan Erbol Tájibaev jarysty aıaqtady. Aqtyq synda Jánnat Ádilhanqyzy men Muratbek Haırolda baq talastyrdy.
Aıta keteıik, "Qazaqstan daýysy" konkýrsynyń bas júldesi - 5 mıllıon teńge jeńimpazǵa buıyrdy.
