Qazaqstan daryndy sheteldik jastarǵa Nazarbaev Ýnıversıtetinde bilim alýǵa úkimettik grant usynady
ASTANA. QazAqparat - Qazaqstan daryndy sheteldik jastarǵa Nazarbaev Ýnıversıtetinde bilim alýǵa úkimettik grant usynady. Bul týraly búgin «Sheteldik jumys kúshin tartý salasyndaǵy zańnamany jetildirý» taqyrybynda ótken dóńgelek ústel barysynda QR Eńbek jáne halyqty áleýmettik qorǵaý mınıstri Tamara Dúısenova málim etti.
«Talantty jastarǵa, birinshi kezekte TMD elderi men sheteldik elderdiń jastaryna Nazarbaev Ýnıversıtetinde bilim alý úshin Qazaqstan Úkimetiniń grantyn usyný múmkinshiligi qarastyrylýda. Eger bul stýdentter oqýyn jaqsy aıaqtap, 5 jylǵa deıin osynda qalýǵa nıet bildirse, onda biz olardyń Qazaqstanda qalý jáne kvota men ruqsat alýdan tys jumys tabýy múmkinshiligin qarastyramyz», - dedi mınıstri. Onyń atap ótýinshe, búginde mınıstrlik elimizdiń ekonomıkasy úshin asa qajetti 20 kásiptiń túrin anyqtap otyr. «Talap etiletin kásipterdiń tizilimin anyqtaý úshin boljaýdyń jańa ádisin daıyndadyq. Naýryz, sáýir, mamyr aılarynda beıimdep, elimizdiń ekonomıkasy úshin asa qajetti shamamen 20 kásip túrin anyqtadyq. Endigi ýaqytta osy ádis negizinde bizder úshin asa qajetti mamandyqtardy óńdeý ónerkásibi, agroónerkásip kesheni jáne geologııalyq barlaý salalarynda anyqtap otyrmyz», - dedi T.Dúısenova.
