Qazaqstan dárilik zattyń patent ıesinen lıtsenzııasyn májbúrlep alýǵa qol jetkizedi

ASTANA. KAZINFORM – Májilis «Zııatkerlik menshik quqyqtarynyń saýda aspektileri jónindegi kelisimge tolyqtyrý engizý týraly hattamany ratıfıkatsııalaý týraly» Zańdy qabyldady.

“Qaralyp otyrǵan zań jobasy Dúnıejúzilik saýda uıymynyń zııatkerlik menshik quqyqtarynyń saýda aspektileri jónindegi kelisiminiń ajyramas bóligi sanalady. Bul kelisim ulttyq qaýipsizdikti jáne Qazaqstan halqynyń densaýlyǵyn saqtaýdy qamtamasyz etýge, sonymen qatar sapaly jáne tıimdi dárilik preparattarǵa qoljetimdilikti qamtamasyz etýge baǵyttalyp otyr. Bul rette atalǵan kelisim dárilik zattyń patent ıesi oǵan qol jetkizýdi shektegen, sondaı-aq óziniń aıryqsha quqyqtaryn teris paıdalanǵan jaǵdaılarda, mysaly, uıymnyń múshe memleketteriniń biri dárilik zattardy ishki tutyný nemese uıymnyń basqa múshe memleketterine eksporttaý maqsatynda patent ıesi tarapynan kedergiler bolǵan kezde Qazaqstannyń uıym keńesi arqyly patent ıesinen lıtsenzııany májbúrlep alý tetigi qarastyrylyp otyr”, - dedi zań jobasyn tanystyrǵan Densaýlyq saqtaý mınıstri Aqmaral Álnazarova.

Aıta keteıik, Zııatkerlik menshik quqyqtarynyń saýda aspektileri jónindegi kelisimge tolyqtyrý engizý týraly hattama Dúnıejúzilik saýda uıymyna qatysýshy elderge patenttelgen dárilik zattardyń quqyq ıelenýshisiniń ruqsatynsyz keıinnen eksporttaý úshin májbúrlemeli lıtsenzııalar boıynsha dárilik zattardy óndirýge quqyq berýdi kózdeıdi. Hattama Jenevada 2005 jylǵy 6 jeltoqsanda jasaldy jáne Zııatkerlik menshik quqyqtarynyń saýda aspektileri jónindegi kelisimniń ajyramas bóligi sanalady.

Depýtattar Zańdy qabyldap, Senat qaraýyna jiberdi.