Qazaqstan dárilik zattardy baqylaý boıynsha halyqaralyq deńgeıge jetti
ASTANA. KAZINFORM — DDSU Qazaqstannyń dárilik zattardy retteý júıesin joǵary baǵalady, dep habarlaıdy Medıtsınalyq jáne farmatsevtıkalyq baqylaý komıtetiniń baspasóz qyzmeti.
Qazaqstannyń dárilik zattar aınalymyn retteý júıesi Dúnıejúzilik densaýlyq saqtaý uıymynyń (DDSU) baǵalaýy boıynsha jetilýdiń úshinshi deńgeıinde. Bul ulttyq baqylaý júıesiniń halyqaralyq talaptarǵa sáıkes keletinin jáne dárilik preparattardyń sapasyn, qaýipsizdigi men tıimdiligin baǵalaýdyń senimdi tetikterin qamtamasyz etetinin bildiredi.
Vedomstvo atap ótkendeı, bul deńgeıge jetý — farmatsevtıka salasyn retteý, memlekettik baqylaý júıesin damytý jáne dárilik zattar aınalymyna zamanaýı tásilderdi engizý boıynsha júrgizilgen júıeli jumystyń nátıjesi.
2026 jyldyń birinshi jartyjyldyǵynda dárilik zattardy óndirýshilerge 18 farmatsevtıkalyq ınspektsııa júrgizildi, onyń 16-sy táýekelge negizdelgen tásildi qoldaný arqyly ótti.
Mundaı tásil baqylaýdy tıimdirek uıymdastyrýǵa múmkindik beredi: birinshi kezekte joǵary táýekel deńgeıi bar obektilerge kóńil bólinedi, bul yqtımal máselelerdi ýaqytyly anyqtaýǵa jáne óndiriletin dárilik zattardyń sapasyn qamtamasyz etýge kómektesedi.
Sonymen qatar, farmakologııalyq qadaǵalaý júıesin, ıaǵnı dárilik preparattardyń naryqqa shyqqannan keıingi qaýipsizdigin monıtorıngileýdi damytý jalǵasyp jatyr.
Negizgi baǵyttardyń biri — tsıfrlyq sheshimderdi engizý, sonyń ishinde medıtsınalyq aqparattyq júıelerde «Sary kartalar» modýlin damytý. Bul qural medıtsına qyzmetkerlerine dárilik preparattarǵa yqtımal jaǵymsyz reaktsııalar týraly jedel habarlaýǵa jáne olardy baǵalaý tıimdiligin arttyrýǵa múmkindik beredi.
— Farmakologııalyq qadaǵalaý júıesin jetildirý dári-dármekterdi qoldanýǵa baılanysty yqtımal táýekelderdi tezirek anyqtaýǵa jáne taldaýǵa, sondaı-aq halyqaralyq standarttarǵa sáıkes ulttyq baqylaý júıesin damytýǵa kómektesedi. Qazaqstannyń farmatsevtıka salasy úshin jetilýdiń úshinshi deńgeıin baǵyndyrý, onyń DDSU tarapynan naqtylanýy mańyzdy nátıje sanalady jáne dárilik zattardyń sapasy men qaýipsizdigin qamtamasyz etý boıynsha júrgizilip jatqan jumystardyń tıimdiligin rastaıdy, — delingen komıtet taratqan aqparatta.
Buǵan deıin eldegi otandyq dári-dármek óndirisi 39,8%-ǵa jetkenin jazdyq.
