Qazaqstan dárigerleri jatyr moıyny obyryn tegin tekseredi
ALMATY. QazAqparat - Almatydaǵy QR Onkologııa jáne radıologııa ǵylymı zertteý ınstıtýtynda (ǴZI) aldaǵy senbi kúni áıelderdi jatyr moıyny obyry boıynsha tegin tekserý ótedi, dep habarlaıdy QazAqparat tilshisi atalǵan ǴZI málimetine silteme jasaı otyryp.
Almaty qalasynda ornalasqan Qazaq onkologııa jáne radıologııa ǴZI-da 27 qańtar kúni jatyr moıyny obyry boıynsha tegin tekserý júredi. Sonymen qatar, mundaı tekserýler Dúnıejúzilik obyrmen kúres kúni jáne jatyr moıyny obyryna qarsy onkúndik sharasy aıasynda 27 qańtar kúni Qazaqstannyń barlyq aımaqtyq onkodıspanserlerinde de ótkpek.
«Qazaqstannyń áıelderi onkogınekologta tegin tekserilip, dáriger keńesin ala alady. Qosymsha málimetterdi +7(727)292-90-63 telefon nómirleri boıynsha, al aımaqtarda jergilikti onkodıspaserlerden alýǵa bolady», - delingen habarlamada.
Dárigerlerdiń aıtýynsha, Qazaqstanda jyl saıyn 1700 áıel atalǵan dert boıynsha tirkeýge alynady jáne 600 adam osy dertten kóz jumady. Jatyr moıyny obyry - Qazaqstan áıelderi úshin omyraý qaterli isiginen keıingi ekinshi orynda turǵan asa qaýipti aýyrý. Jyl saıyn álem boıynsha 500 000 adam atalǵan dert boıynsha dárigerler baqylaýyna alynǵanymen álemniń 260 000 áıeli jylyna osy derttiń kesirinen ómirden ótedi.
Qazaqstanda 2008 jyldan beri Ulttyq skrınıng baǵdarlamasy bar. Mamandar 30-70 jas aralyǵyndaǵy áıelder 4 jylda 1 ret mindetti túrde tekserilýden ótip turýy qajet ekenin qatań eskertedi.
