Qazaqstan dárigerleri óńeshi bitelip týǵan shaqalaqqa kúrdeli ota jasady
Shymkent qalalyq klınıkalyq balalar aýrýhanasynda dárigerler eki kún buryn dúnıege kelgen sábıge kúrdeli operatsııa jasady. Náreste óńeshi bitelip týǵan. Alǵashqy ota sátti ótti. Qazir kishkentaı patsıent perınataldyq ortalyqtan aýrýhanaǵa aýystyryldy. Endi ony hırýrgııalyq aralasýdyń ekinshi kezeńi kútip tur. Operatsııany Qazaqstan hırýrgtary halyqaralyq forým aıasynda tájirıbe almasý barysynda jasady.
«Keshegi kúni Shymkentte elimizdegi balalar hırýrgııasynyń negizin qalaýshy, akademık Kamal Ormantaevtyń 85 jyldyǵyna arnalǵan Balalar hırýrgtarynyń ІІ forýmy ótti. Halyqaralyq sharaǵa Túrkııa, Ózbekstan, Tájikstan, Orta Azııa elderindegi balalar hırýrgııasy qoǵamdastyǵynyń tóraǵalary men dárigerleri qatysty. Forým aıasynda Shymkent qalalyq klınıkalyq balalar aýrýhanasynda travmatologııa, neırohırýrgııa otalary boıynsha sheberlik sabaq ótti. Onda elimizdiń barlyq óńirinen jınalǵan balalar hırýrgtary tájirıbe almasty», - deıdi Shymkent qalalyq Densaýlyq saqtaý basqarmasynyń baspasóz hatshysy Laýra Nahypqyzy.
Sondaı-aq forým aıasynda «skolıoz» dıagnozy qoıylǵan 12 jastaǵy balaǵa travmatologııalyq operatsııa jasaldy. Ota kezinde dárigerler naýqastyń qısaıǵan omyrtqasyn hırýrgııalyq jolmen túzep berdi.
Al neırohırýrgııalyq operatsııa kezinde elimizdiń bas balalar neırohırýrgi Ǵabıt Ólenbaıdyń jetekshiligimen 15 jastaǵy qyzdyń bas súıegine kúrdeli ota jasaldy.
«Sheberlik sabaǵynda endovıdeohırýrgııa, laparoskopııa, torakoskopııa ádisimen otalar jasaldy. Bul operatsııalar tiliksiz jasalǵandyqtan, naýqastyń saýyǵyp ketýine zor múmkindik beredi», - deıdi Shymkent qalalyq klınıkalyq balalar aýrýhanasy bas dárigeriniń orynbasary Erjan Baıdýllaev.