Qazaqstan dáriger mamandarmen qamtamasyz etý jaǵynan álemde 10-shy oryndy alady
ASTANA. QazAqparat - Jyl saıyn elimizdiń jetekshi ǵylymı ortalyqtary men JOO-da 30 myńdaı maman biliktiligin arttyrady. Bul týraly QR Densaýlyq saqtaý jáne áleýmettik damý mınıstrliginiń selektorlyq rejimdegi alqa otyrysynda málim boldy.
Jıyn barysynda «Salamatty Qazaqstan» memlekettik baǵdarlamasyn iske asyrýdyń aldyn ala qorytyndylary tyńdaldy. Aǵymdaǵy jyldan bastap Biryńǵaı ulttyq densaýlyq saqtaý júıesiniń uıymdy erkin tańdaý, básekelestik, nátıjege qaraı aqy tóleý, «aqsha naýqaspen birge júredi» sııaqty qaǵıdalary emhana deńgeıinde engizilýde.
«Sapaly medıtsınalyq kómek - eń aldymen medıtsınalyq kadrlardyń joǵary kásibı biliktiligi. Mamandardy oqytý baǵdarlamalary ıkemdi formatqa (modýldik, qashyqtyqtan, jumys oryndarynda) aýystyryldy. Jyl saıyn elimizdiń jetekshi ǵylymı ortalyqtary men JOO-da 30 myńdaı maman biliktiligin arttyrady. Sheberlik sabaqtaryna 17 eldiń mamandary tartyldy. 3 jylda 600-den astam maman álemniń úzdik klınıkalaryna jiberildi. Álemdik tájirıbege sáıkes mamandardyń bilimderi men mashyqtaryn táýelsiz baǵalaıtyn ortalyqtar quryldy»,-delingen vedomsvtonyń baspasóz qyzmeti taratqan málimette.
Belgili bolǵandaı, Qazaqstan dáriger mamandarmen qamtamasyz etý jaǵynan álemde 10-shy oryndy alady. Jalpy, respýblıkada mamandar tapshylyǵy 10 paıyzǵa, onyń ishinde aýyldyq jerlerde 28 paıyzǵa tómendedi.
Tegin beriletin dárilik quraldar tizimi ońtaılandyryldy. 2013 jyldan bastap búkil respýblıka boıynsha dárilik qamtamasyz etýdiń avtomattandyrylǵan aqparattyq júıesi engizildi. 3 myńnan astam eldi mekende medıtsınalyq-sanıtarııalyq alǵashqy kómek nysandary arqyly aýyl turǵyndaryna dáriler jetkizý uıymdastyryldy. Tegin medıtsınalyq kómektiń kepildendirilgen kólemi sheńberinde dári-dármekke baǵany qalyptastyrý tártibi bekitildi.
